Ámir nebári 15 jasta. Soǵan qaramastan, túrli halyqaralyq dodalarda ózinen eresek oıynshylardy utyp, kópshiliktiń qoshemetine bólenip júr. Buǵan deıin talantty oıynshy «ITF Juniors» sanatyndaǵy týrnırlerde tórt ret top jardy. Ámir Qaraǵandyda týyp-óskenimen, qazirgi kezde Chehııanyń eń úzdik tennıs akademııalarynyń birinde sheberligin shyńdap júr. Qap taýy bókterinde qarsylas shydatpaǵan óren aqtyq synda ázerbaıjandyq Kanan Gasımovti 6:1, 6:3 esebimen oısyrata utty. Bir keremeti, qandasymyz týrnır barysynda básekelesterine birde-bir sette utylǵan joq. Sonymen qatar juptyq oıynda da aldyna jan salmady. Aqtyq synda bolgarııalyq Ivan Naıdenov ekeýi Qazaqstannyń ókilderi Ilııas Maratuly men Vıtalıı Zasepınnen basym tústi – 6:3, 6:4.
