Oblystyq Polısııa departamenti esirtki bıznesine qarsy kúres basqarmasynyń qyzmetkerleri kúdiktilerdi «Petropavl-Astana» avtojolynda ustady. Petropavldan Astanaǵa qaraı yzǵytqan «Volkswagen Passat» kóligi polısııanyń toqta degen belgisin kórmegen bolyp, júrisin jalǵastyra bergen. Biraq kólik Aqqaıyń aýdanynyń aýmaǵyndaǵy Astrahan aýylynyń túbinde báribir toqtatyldy. Kólik salonynda 29 jáne 30 jastaǵy eki petropavldyq bolǵan. Polısııa ekeýin de syrtqa shyǵaryp, qoldaryna kisen salǵannan keıin avtomobıldiń bagajyn tekseredi. Bagajdy ashqanda 5 qapqa salynǵan shópten jasalǵan zattardyń ıisi ańqyp qoıa bergen. Artynan saraptama qorytyndysy qaptardaǵy shóptiń salmaǵy 128 kg-ǵa teń marıhýana ekenin anyqtap bergen.
Ustalǵandardyń biri – 29 jastaǵy jigit buryn da esirtki tasymaldaǵany úshin qylmystyq jazaǵa tartylyp, sotty bolǵan. Kúdiktiniń úıin, qora-qopsysyn teksergende taǵy da 200 kg marıhýana men 21 kg 300 gramm gashısh tabylǵan. Barlyq esirtkiniń salmaǵy 464 kılogramǵa jetken. Bir aıta keterligi, buryn marıhýana ońtústikten soltústikke tasymaldanýshy edi, endi kerisinshe soltústikten ońtústikke tasyla bastaǵan. Munyń bir máni bar. Bul esirtkini tutynýshylar Astana mańynda kóbeıe túskenin de kórsetedi.
Soltústik Qazaqstan oblysy Polısııa departamenti bastyǵynyń orynbasary, polkovnık Rýslan Nazarov qazir eki kúdiktiniń qamaýǵa alynyp, bul derek boıynsha qylmystyq is qozǵalǵanyn jetkizdi. Polkovnıktiń aıtýynsha, jyl basynan beri oblys aýmaǵynda esirtki qylmysyna qatysty 44 kúdikti anyqtalǵan. Olar esirtkiniń zańsyz aınalymy boıynsha 68 qylmys jasaǵan bolsa, onyń 20-sy esirtki taratýǵa qatysty. Osy qylmystardy ashý barysynda 22 kg túrli esirtki zattary tárkilengen. Onyń 800 gramy sıntetıkalyq esirtki. Munyń barlyǵy Petropavl aýmaǵynda esirtki aınalymynyń aýqymy ósip kele jatqandyǵyn kórsetedi. Al sońǵy tárkilengen 128 kg esirtki – julynqurttyń shekten shyqqandyǵynyń aıǵaǵy.
Oblystyq Polısııa departamenti esirtki bıznesine qarsy kúres basqarmasynyń bastyǵy, polısııa podpolkovnıgi Ivan Terzıdı osydan eki aı buryn 15 orynǵa jasandy esirtki untaqtaryn tastap ketýmen aınalysyp júrgen 21 jastaǵy jigittiń ustalǵanyn aıtqan edi. «α-PvP» dep atalatyn sıntetıkalyq esirtkini jasaýshylar ony ınternet arqyly satyp, aq untaqty belgili oryndarǵa tyǵyp ketip otyrǵan. Bul da – esirtki jasaý men taratýdyń óńirde «bir jolǵa qoıylǵandyǵyn» kórsetetin fakt. Osynyń bárin eskere otyryp Soltústik Qazaqstan oblysynyń polısııasy ǵana emes, esirtki bıznesimen respýblıkalyq deńgeıde kúresetin mamandar tize qosyp, julynqurttyń túp tamyryn qurtýǵa erekshe den qoıý qajet.
Soltústik Qazaqstan oblysy
