Merzimdi áskerı qyzmetin ótkergen sarbazdardyń jeńildikpen bilim alý sharttaryn Qorǵanys mınıstrligi 2022 jyly ázirledi. Bıyl mamyr aıynda áskerı keńeste Memleket basshysy bul bastamany maquldap, tıimdi iske asyrý úshin tıisti tapsyrmalar berdi. Erbol Qumarbekulynyń aıtýynsha, elimizdiń 70-ten astam joǵary oqý ornymen sharttar jasalǵan. Al Qorǵanys mınıstriniń keńesshisi Aıgúl Tólembaeva irikteýge yńǵaıly bolý úshin «Srochnıkı 2.0» sıfrlyq platformasy engizilgenin aıtty. Bul platformaǵa Qarýly kúshterdiń, Ulttyq ulannyń, TJM, Memlekettik kúzet qyzmetiniń 110-nan astam áskerı bólimi tirkelgen.
«Bul júıede áskerı qyzmetin ótegender jáne olardy aýystyrý qyzmetiniń barlyq kezeńindegi baǵalaý kórsetiledi. Jaýyngerlik daıarlyqtyń barlyq páni boıynsha áskerı qyzmetshiniń aǵymdaǵy baǵalarynyń reıtıngi aı saıyn shyǵarylady. Esepke alý áskerdegi jaýyngerlik daıyndyq jýrnaldarynda jáne osy elektrondyq platformada bir mezgilde júrgiziledi. Elektrondyq júıede ár sarbazǵa jeke reıtıng jasalady», dedi mınıstrdiń keńesshisi Aıgúl Tólembaeva.
Kandıdattardy irikteý mynadaı krıterııler boıynsha júrgiziledi: jaýyngerlik daıyndyq; jeke tártip; arnaýly mindetterdi oryndaýdyń tolyqtyǵy jáne psıhologııalyq jaǵdaıdy baǵalaý. Ár sarbaz úsh JOO-nyn tańdaıdy. «Srochnık 2.0» elektrondyq júıesinde sarbazdardy JOO-dary boıynsha bólý avtomatty túrde júrgiziledi.
«Konkýrstyq irikteýge 2022 jyly kóktemde áskerge shaqyrylǵan merzimdi áskerı qyzmettiń 12 548 áskerı qyzmetshisi qatysyp jatyr. Qazir 1500 oryn bólinedi. 2022 jyly kúzde áskerge shaqyrylǵan sarbazdar úshin 1500 oryn bólinetin taǵy bir kezeń ótedi», dedi óz sózinde A.Tólembaeva.
