Alǵashqy eki kúnniń qorytyndysy boıynsha Qazaqstan quramasy tórt medal jeńip aldy. 60 kılo salmaqta synǵa túsken Maǵjan Shamshadın barlyq qarsylasyn qapy qaldyryp, jeńis tuǵyrynyń eń bıik satysyna kóterildi. Bul týrnırde ol ázerbaıjandyq Nádir Talıbov, ózbekstandyq Bahrom Botýrov, tájikstandyq Merzod Sýfıev jáne fransııalyq Sedrık Revoldy shań qaptyrdy. 66 kılo salmaqta kúresken Ǵusman Qyrǵyzbaevtyń da elorda tórinde Qazaq eliniń ánuranyn shyrqatýǵa tamasha múmkindigi boldy. Barlyq básekede qarsylastaryn qapy qaldyrǵan Ǵusman fınalda ıspanııalyq Davıd Garsııa Torneden utylyp, kúmis medaldy qanaǵat tutty.
Al 73 kılo salmaq dárejesinde synǵa túsken Danııar Shamshaev pen Asqar Narqulov qola júldeni ıelendi.
