Jýyrda ǵana atalǵan jarystyń kardy taǵy bir qyzyqty básekemen tolyqty. Atap aıtsaq, sýper jeńil salmaqtyń (53 kılo) altyn belbeýin qazaqtyń qos qyrany – Qazybek Saǵyn men Baǵdat Jubanysh ózara sarapqa salady. Bul esimder sportsúıer qaýymǵa jaqsy tanys. 29 jastaǵy Qazybek Almatyda irgetasy qalanǵan DAR Pro Team klýbynyń namysyn qorǵaıdy. Kezinde ol – qoıan-qoltyq aıqastan álemniń úsh dúrkin chempıony atandy. Aralas jekpe-jekten tórt kezdesý ótkizip, barlyǵynda aıqyn basymdyq tanytty. Byltyrǵy jyldyń qarasha aıynda Aqtóbede ótken týrnırde Saǵyn aǵylshyn faıteri Djon Shınkti qylqyndyryp tastap, Naiza lıgasynyń chempıondyq belbeýin ıelendi.
Baǵdat Qazybekten eki jas kishi. Ol – Aqtóbeniń «Erkin kúsh» klýbynyń múshesi. Osyǵan deıin qazaq sportshysy áýesqoılar arasynda tabysty óner kórsetip, 10 kezdesýdiń barlyǵynda jeńiske jetti. Kásipqoılardyń saıysynda da Jubanysh ózin jaqsy qyrynan kórsetip, eki qarsylasyn da «qylqyndyrý» ádisimen jeńdi. Taǵy bir aıta keterligi, qandasymyzdyń MMA-dan úsh dúrkin álem chempıony degen dardaı ataǵy bar.
Joǵaryda esimderi atalǵan qos sańlaq osydan birneshe jyl buryn MMA-dan ótken álem chempıonatynyń fınalynda kúsh synasty. Asa shıelenisti ótken sol jekpe-jekte Baǵdat Jubanysh tóreshilerdiń sheshimimen jeńiske jetken edi. Endi óziniń chempıondyq ataǵyn saqtap qalý úshin ol baryn salatyny anyq. Al Qazybek Saǵyn osy joly óziniń myqtylyǵyn moıyndatyp, altyn belbeýdi ıelenetinine senimdi. Sol sebepti de bul qarymta kezdesý Qazaqstannyń barsha jankúıeriniń erekshe qyzyǵýshylyǵyn týdyryp otyr.
