Atalǵan is-sharaǵa Mádenıet jáne sport mınıstrligi, Arhıv, qujattama jáne kitap isi komıtetiniń tóraǵasy Qýat Borash, hımııa ǵylymdarynyń doktory, akademık Arystan Ǵazalıev, alashtanýshy ǵalym Sultan han Júsip, alashordalyq dáriger Baqtyǵalı Bısenovtiń qyzy Roza Bısenova jáne taǵy basqa tanymal tulǵalar qatysyp, qor ıesi týraly estelikterimen bólisti.
Álıhan Hamzauly eńbek jolyn 1966 jyly Almaty qalasyndaǵy №2 qalalyq klınıkalyq aýrýhananyń hırýrgııa bóliminen bastap, Qazaq onkologııa jáne radıologııa ǵylymı zertteý ınstıtýtynda eńbek jolyn jalǵastyrypty. Zeınet jasyna shyqqanǵa deıin otandyq medısına salasynda abyroıly eńbegimen elenip, kóptegen ǵylymı eńbek jazdy. Onyń syrtynda medısına ǵylymdarynyń doktory, professor deńgeıine kóterildi.
Ol kásibı dáriger retinde onkologııa jáne radıologııa ǵylymı zertteý ınstıtýty ǵalymdary júrgizgen ǵylymı jumystardyń qorytyndylaryn tájirıbege engizý, aýyr naýqastardy tıimdi emdeý tásilin júzege asyrýmen qatar, qaterli isikterdiń sáýlelik terapııasymen aınalysatyn úsh qurylymdy iri klınıkalyq radıologııa bólimine jetekshilik jasaǵan.
Osylaı otandyq medısına salasyna jartyǵasyrlyq eńbek sińirip, ult densaýlyǵyn jaqsartý jáne elimizde medısına ǵylymyn damytý jolynda ter tókti. Nátıjesinde, «Qazaqstannyń eńbek sińirgen qaıratkeri» ataǵymen jáne «Qurmet» ordenimen marapattalyp, medısına ǵylymynyń damýyna qosqan mańyzdy úlesi úshin halyqaralyq «Hippocrat», «Avicenna», «Pırogov» ordenderiniń ıegeri atandy. Sonymen qatar P.M.Pospelov atyndaǵy jáne Ulttyq medısına qaýymdastyǵy medalin alyp «Altyn dáriger» ataǵy berildi.
Álıhan Hamzaulynyń otandyq medısına tarıhyna qatysty jazǵan qundy týyndylarynyń biri – «Alǵashqy Alash dárigerleri» atty kitaby. Bunyń bastapqy bóligi 70-80 jyldary jazylyp, keńestik senzýra tarapynan joıylǵany belgili. Qazirgi nusqasy ulttyq medısınanyń damýy men qalyptasýy jolyndaǵy alǵashqy birtýar dárigerlerdiń qaıratkerligi men murasyn baıandaıdy.
