Senat tóraǵasy Qyrǵyzstan Qazaqstan úshin Ortalyq Azııadaǵy negizgi seriktes jáne odaqtas memlekettiń biri ekenin atap ótti. Búginde eki el arasynda dıplomatııalyq baılanys ornaǵanyna 30 jyl toldy. Osy ýaqyt aralyǵynda ártúrli salada 150-den astam shart pen kelisimdi qamtıtyn berik quqyqtyq baza qalyptasty.
«Qazirgi tańda elderimiz arasynda ózara syılastyq pen tatý kórshilikke negizdelgen qarym-qatynas qalyptasqan. Memleketterimizdiń basshylary ornatqan tyǵyz yntymaqtastyqty bizdiń Parlamentterimiz de joǵary deńgeıde jalǵastyryp otyr. Senatta Qyrǵyz Respýblıkasynyń Jogorký Keneshimen yntymaqtastyq toby quryldy. Aldaǵy ýaqytta da Senat baýyrlas Qyrǵyz elimen parlamentaralyq baılanysty nyǵaıtý baǵytyndaǵy jumysty dáıekti túrde jalǵastyra beredi», degen Máýlen Áshimibaev Memleket basshysynyń bastamasymen elimizde iske asyrylyp jatqan reformalardyń mańyzyna toqtalyp ótti.
О́z kezeginde Nurlanbek Shakıev Qazaqstandaǵy saıası jáne ekonomıkalyq ózgeristerdi joǵary baǵalap, eki memleket arasyndaǵy baılanysty ári qaraı damytýdyń mańyzyna toqtaldy.
«Qyrǵyzstan men Qazaqstan arasynda qandaı da bir ekonomıkalyq jáne saıası qarama-qaıshylyq joq. Biz ejelden irgeles qonǵan baýyrlas halyqtar retinde únemi bir-birimizdi qoldap kelemiz. Memleketterimizdiń basshylary Sadyr Japarov pen Qasym-Jomart Toqaev eki el arasyndaǵy, onyń ishinde parlamentaralyq deńgeıdegi ózara qarym-qatynasty odan ári nyǵaıtýǵa belsendi yqpal etip keledi», dedi Jogorký Kenesh tóraǵasy.
Sonymen qatar kezdesý barysynda sý resýrstaryn basqarýǵa qatysty yntymaqtastyqty nyǵaıtý isine Parlament depýtattarynyń qatysý máselesi sóz boldy. Astana halyqaralyq forýmynda Qyrǵyzstan Prezıdenti Sadyr Japarov ta osy jaıttyń ózektiligin tilge tıek etken bolatyn.
Senat tóraǵasy Qyrǵyzstanda Sý kodeksi qabyldanǵanyn eskere otyryp, zań shyǵarý jumysynda osy baǵytta tájirıbe almasýǵa qyzyǵýshylyq tanytty. Soǵan baılanysty ol sý resýrstaryn basqarý jobalaryn talqylaý úshin ekijaqty jumys tobyn qurýdy usyndy.
«Bizdiń aımaqta sý máselesi óte ózekti ekeni belgili. Sondyqtan bul baǵyttaǵy problemalardy birlesip sheshýdiń mańyzy zor. Bizdiń tatý kórshilik jáne odaqtastyq qarym-qatynasymyzdy eskere otyryp, osy máseleler boıynsha ashyq ári syndarly dıalog quramyz dep úmittenemin», dedi Máýlen Áshimbaev.
Odan bólek, suhbat kezinde eki el arasyndaǵy óńiraralyq ózara is-qımyldy arttyrý, saýda-ekonomıkalyq jáne mádenı-gýmanıtarlyq baılanysty keńeıtý máseleleri áńgimege arqaý boldy.
Aıta keteıik, Qyrǵyzstan Jogorký Keneshi delegasııasynyń sapary aıasynda elimizdiń basshylyǵymen, Qazaqstan halqy Assambleıasynyń múshelerimen birqatar kezdesý jáne basqa da is-shara josparlanǵan.
