Sýretterdi túsirgen Erlan OMAR, «EQ»
Is-sharaǵa Aqparat jáne qoǵamdyq damý mınıstri Darhan Qydyráli, Astana qalasynyń ákimi Jeńis Qasymbek, «Qazaq gazetteri» JShS bas dırektory Dıhan Qamzabekuly, birqatar respýblıkalyq buqaralyq aqparat quralynyń basshylary, jýrnalıstıka ardagerleri men zııaly qaýym ókilderi, mádenıet salasynyń qyzmetkerleri, elordalyq máslıhat depýtattary men jýrnalıster qaýymy qatysty.
«Egemen Qazaqstan» jáne «Kazahstanskaıa pravda» gazetteri redaksııasynyń qarsy aldynan oryn tepken bul saıabaq – qolyna qalam ustaǵan tilshiler qaýymynyń, buqaralyq aqparat quraldary qyzmetkerleriniń basyn qosatyn, ortaq jetistikterimizdi atap ótetin, buqaralyq-mədenı is-sharalar uıymdastyratyn alańǵa aınalmaq. Ashylý saltanatynda sóz sóılegen mınıstr Darhan Qydyráli saıabaq ulttyq rýhanııat sabaqtastyǵynyń sımvoly jáne qazaq zııalylarynyń jolynyń jalǵasy ekenin atap ótti.
– Búgin qazaq jýrnalıstıkasy úshin tarıhı sát oryn aldy deýge bolady. Elordadaǵy «Egemen Qazaqstan» kóshesinde Jýrnalıster saıabaǵy ashylyp otyr. Bul oqıǵany elimizdegi jýrnalısterge kórsetilgen qurmettiń bir kórinisi dep baǵalaýǵa bolady. Osydan eki jyl buryn dál osy mańda Memleket basshysynyń qatysýymen Alash qaıratkerleriniń eskertkishi ashylǵany belgili. Sol qalamgerler saıabaǵyna ulasyp jatqan jýrnalıster saıabaǵy ulttyq rýhanııattyń sabaqtastyǵyn kórsetedi, – dedi mınıstr.
Jýrnalıster saıabaǵyndaǵy sándi stellada Qazaq ulttyq baspasóziniń baǵdary bolǵan Ahmet Baıtursynuly men táýelsiz qazaq basylymdarynyń bahadúri Sheraǵańnyń beınesi qatar ornalasýy da ulylardyń uly jolynyń jalǵastyǵyn bildiretinin atap ótken Darhan Qydyráli elimizdegi belgili basylymdar men aqparat quraldarynyń aty oıyp jazylǵan bul eskertkishti otandyq jýrnalıstıkanyń jylnamasy dep baǵalaýǵa bolatynyn jetkizdi.
– Taıaýda ǵana Prezıdenttiń qamqorlyǵymen 2 aqpan «Ulttyq baspasóz kúni» bolyp belgilendi. Bul da qazaq baspasózine kórsetilip otyrǵan úlken qoldaý dep bilemiz. Elordamyzdyń órkendeýine jýrnalıster kóp eńbek sińirip jatyr. Sondyqtan bul ıgi is-shara – Astananyń týǵan kúnine, 25 jyldyq mereıtoıyna arnalǵan úlken tartý. Aıta ketken jón, «Egemen Qazaqstan» gazeti ǵımaratynyń aldyndaǵy qaraýsyz jatqan jerdi sándi saıabaqqa aınaldyrý ıdeıasy osydan tórt jyl buryn, bas basylymnyń ǵasyrlyq belesinde kelgen edi. Sonyń sáti búgin túsip otyr. Egemendiktermen birge barsha áriptesterimdi quttyqtaımyn. Bolashaqta bul sándi saıabaq barsha jýrnalısterdiń basyn qosatyn, shyǵarmashylyqqa shabyt beretin, ıgi is-sharalar ótetin alańǵa aınalady dep senemin, – degen Darhan Qydyráli osy iske qoldaý kórsetken qala ákimdigine jáne shahar basshysy Jeńis Qasymbekke alǵys bildirdi.
Elordamyz 25 jyldyń ishinde tek ákimshilik ortalyq qana emes, shyǵarmashylyq, mádenı jáne rýhanı ordaǵa aınalǵanyn atap ótken qala ákimi qala kúni qarsańynda ashqan Jýrnalıster saıabaǵy elimizdiń bas basylymy atyndaǵy kóshede ornalasýyn zańdy qubylys dep sanaıtynyn jetkizdi. «Bul saıabaq osydan birneshe jyl buryn ashylǵan Qalamgerler saıabaǵymen ushtasyp jatyr. Ol jerde qazaqtyń alǵashqy gazetterin ashqan Alash arystarynyń eskertkishi tur. Búgingi is-shara sol kezde qolǵa alynǵan jaqsy bastamanyń jalǵasy ispettes», dedi Jeńis Qasymbek.
Shahar basshysy óz sózinde qazirgi tańda elordada turǵyndardyń qolaıly demalysy úshin jańa ári tartymdy oryndar kóptep ashylyp jatqanyn da atap ótti. «Búgin jandanǵan kóshelerdiń biri – Sátbaev kóshesin araladym. Munda biz Qajymuqan kóshesinen Petrov kóshesine deıin qaıta jańǵyrtý jumysyn júrgizip jatyrmyz. Sonymen qatar Qajymuqan kóshesinen Petrov kóshesine deıingi jumys aıaqtaldy. Kóleńkeli shatyrlar, oıyn alańdary ornatylyp, aǵashtar men jasyl jelekter otyrǵyzyldy. Petrov kóshesi men B.Momyshuly dańǵyly aralyǵyndaǵy ýchaskeni qyrkúıek aıyna deıin aıaqtaý josparlanyp otyr.
Sol sııaqty qala turǵyndary men qonaqtary úshin Aqbulaq jaǵalaýy jaıly oryndardyń biri bolady, al Amman jáne Abylaı han dańǵylyndaǵy kópirler astynda jaıaý júrginshiler ótkelderi quryldy. Olar Aqbulaq ózeniniń boıyndaǵy saıabaq klasterlerin ózara baılanystyrady. Ortalyq jaǵalaýdyń tarıhı kósheleri (Jeltoqsan, Beıbitshilik, Buqarbaı batyr kósheleri) jańaryp jatyr. Búgingi «Jýrnalıster saıabaǵynyń» ashylýy da elordamyzdyń tartymdylyǵyn arttyryp, kelbetine jańa reń beredi dep esepteımiz», dedi ol.
«Qazaq gazetteri» JShS bas dırektory Dıhan Qamzabekuly qalam ustaǵan qaýymǵa arnalǵan saıabaqtyń Abaı dańǵyly men Kenesary kóshesiniń ortasynan oryn tebýinde úlken mán bar ekenin jetkizdi. «Abaı qazaq úshin danalyqtyń úlgisi bolsa, Kenesary – batyrlyq pen azattyqtyń rámizi. Osy aralyqtan Qalamgerler saıabaǵy ashylyp, Alash qaıratkerlerine arnalǵan tuǵyrtastardyń kóterilýi, osy jerde qazaq gazetteriniń basy qosylyp, ult rýhanııatynyń uıysýy da bekerden-beker emes. Batyrlyq pen danalyqty tekten-tek aıtyp otyrǵanym joq, bul eki qasıet te bizdiń qalam ustaǵan jýrnalısterimizge aýadaı qajet. El úshin eńbek qylatyn soqtyqpaly-soqpaqty jolda osy eki qasıetpen qarýlanǵan áriptesterimiz qandaı qıyndyqty da jeńip, bıik asýlardy eńseredi. Búgingi stellada jazylǵan Sheraǵańnyń «Jýrnalıst – qara nar» degen paıymynyń da arǵy maǵynasy osyǵan saıady», dedi ol.
Sonymen qatar «Qazaq gazetteri» JShS bas dırektory memleket tarapynan jýrnalıster qaýymyna úlken qoldaý kórsetilip jatqanyn da atap ótti. «Kúni keshe kásibı merekemiz qarsańynda Memleket basshysynyń uıytqy bolýymen «Egemen Qazaqstan» jáne «Kazahstanskaıa pravda» gazetteriniń jýrnalısteri páter alyp, qýanyshqa keneldi. Bul ıgi is-shara aldaǵy ýaqytta da jalǵasyn tabady dep senemiz», degen ol elorda basshylaryna jáne saýapty iske muryndyq bolǵan barsha azamatqa alǵysyn bildirdi.
Sý jańa saıabaqta jýrnalıster men qala turǵyndarynyń demalyp, tynyǵýy úshin oryndyqtar qoıylǵan. Olardy kóleńkeleý úshin jańadan aǵashtar otyrǵyzylyp, jasyl jelegi molaıa túsken. Saıabaq aýmaǵynda «Qazaqstan jáne BAQ», «Jýrnalıst jáne operator», «Oqyrman» músinderi tur. «Qazaqstan jáne BAQ» stellasynda ult ustazy Ahmet Baıtursynuly men qazaq jýrnalıstıkasynyń qara nary Sherhan Murtazanyń sózderi jáne elimizdegi negizgi buqaralyq aqparat quraldarynyń ataýlary jazylǵan.
Saıabaqtyń ashylý saltanatyna qazaq jýrnalıstıkasynda ózindik orny bar aǵa býyn ókilderi de qatysqanyn joǵaryda atap óttik. Solardyń biri – «Egemen Qazaqstan» gazetin uzaq jyldar basqarǵan tanymal jýrnalıst, memleket qaıratkeri Saýytbek Abdrahmanov ta óz oıyn ortaǵa saldy. «Saıabaqtyń osy jerden ashylýy «Egemen Qazaqstan» gazetiniń bedelin burynǵydan arttyryp, qazaq jýrnalıstıkasynyń qara shańyraǵy degen beıresmı ataýyn odan ári nyqtaı túsedi. Bul basylymnyń elordamyzdan oryn tebýi jáne búgingi ashylyp otyrǵan alleıa Astanany jýrnalıstıkamyzdyń ortalyǵyna aınaldyryp otyr. Qalam ustaǵan áriptesterime aıtarym, jazarymyz ben jurtqa jetkizer jaqsy jańalyqtarymyz kóbeısin», dedi ol.
Izgi is-sharanyń ortasynan tabylǵan belgili telejýrnalıst Jaına Slambek: «Bul mańda Alash qaıratkerleriniń eskertkishteri bar. Endi onyń qasynan Jýrnalıster saıabaǵy da boı kóterip jatyr. Alash qozǵalysy, Alash uldary týraly oqyp-bilgen toqsanynshy jyldary arada shırek ǵasyr ótkende tutas ult Alash ıdeıasyn tý etetinin oıladyq pa? Munyń bári kóńildi tolqytady. Myń san máselege qaramaı, memleketimiz – máńgilik! Sebebi soǵan yqpaldasatyn, solaı bolýyna qyzmet etetin jýrnalısterdiń júregi «Osy el órkendesin, osy jer kóktesin!» dep soǵady. Bul óte mańyzdy», dep oıyn ortaǵa saldy. Al jýrnalıst Áskerbek Qııas saıabaq týraly oıyn áleýmettik jelide «Keıde tas qoǵamnan sharshaǵanda sherińdi shyǵaryp, úndemeı suhbat berip qaıtatyn jer eken» dep bildiripti. Endeshe, Qalamgerler saıabaǵynyń qaptalynan ashylǵan Jýrnalıster saıabaǵy qolyna qalam ustaǵan qaýymnyń basyn jıi qosatyn ortaq mekenge aınalady dep senemiz.
