Bıyl mektep túlekteri negizgi UBT-ny eki ret tapsyryp, eń úzdik nátıjemen grant konkýrsyna qatysa alady. Osylaısha 162 myń talapker UBT-ny 291 myń ret tapsyrdy.
«Testileý qorytyndysy boıynsha 135 myńǵa jýyq talapker shekti ball jınady, bul qatysýshylardyń jalpy sanynyń shamamen 83%-yn quraıdy. Bul kórsetkishter ótken jylmen salystyrǵanda 16%-ǵa artqan (2022 jyly – 67%). UBT ortasha baly ótken jylǵy kórsetkishten 7 balǵa artyp, 73 baldy qurady (2022 jyly – 66 ball). Bes adam eń joǵary kórsetkish kórsetip, 137 ball jınady. 2868 oqýǵa túsýshi 120 baldan joǵary nátıjege qol jetkizdi», dep túsindirdi QR Ǵylym jáne joǵary bilim vıse-mınıstri Qýanysh Erǵalıev.
Testileý bes pán boıynsha ótkizildi, olardyń úsheýi - mindetti jáne ekeýi - beıindi. Test tapsyrmalarynyń sany 120, onyń ishinde Qazaqstan tarıhy boıynsha – 20, matematıkalyq saýattylyq boıynsha – 15, oqý saýattylyǵy boıynsha – 15 jáne eki beıindik pán boıynsha – 35 tapsyrma. Testileý uzaqtyǵy – 4 saǵat (240 mınýt).
Sondaı-aq erekshe bilim berý qajettilikteri bar talapkerler úshin qosymsha 40 mınýt ýaqyt saqtaldy. Bıyl osyndaı 478 bala UBT tapsyrdy.
Bıyl apellıasııaǵa 50 myńnan astam ótinish berildi, olardyń ishinde 805 ótinish qanaǵattandyryldy. Memlekettik komıssııa jumysyn aıaqtady, talapkerlerdiń sertıfıkattary jeke kabınette qoljetimdi.
UBT ótkizý barysynda 402 talapker smartfon, shpargalka jáne basqa da tyıym salynǵan zattardy alyp ótý áreketi saldarynan test tapsyrý múmkindiginen aıyryldy. Testileý kezinde erejelerdi buzǵany úshin aýdıtorııadan 312 adam shyǵarylyp, olardyń nátıjeleri joıyldy. Keıbir testilenýshilerden jasyryn kameralar, mıkroqulaqqaptar, smartfondar jáne basqa da tyıym salynǵan zattar tabyldy. Bógde tulǵalar anyqtalǵan joq.
Jalpy, negizgi UBT-2023 shtatty rejımde ótti.
