Jalpy, kóziqaraqty qaýym Amangeldi batyrdyń bıik tulǵasyn ataqty halyq sýretshisi Ábilhan Qasteevtiń aıshyqty somdaǵan portreti arqyly jaqsy biledi. Al biz áńgime etip otyrǵan sýrettegi batyr beınesin kórnekti qylqalam sheberi Nıkolaı Krýtılnıkov bederlepti.
Qostanaı oblystyq tarıhı-ólketaný mýzeıiniń basshysy Batyrhan Jumabaıdyń aıtýynsha, bul jumys 1956 jyly ult-azattyq kóterilistiń 40 jyldyǵyna oraı salynǵan. Sol kezde ony Qazaq memlekettik baspasy 15 myń danamen basyp shyǵarǵan.
– Bul kartına 1956 jyly ótken kórmege bir ret qoıylǵan. Odan keıin eshqaıda usynylmaǵan. Jetpis jylǵa jýyq qorda saqtaýly tur. Bıyl Amangeldi Imanovtyń 150 jyldyǵyna baılanysty is-shara ótkizetin boldyq. Sonda atalǵan kóteriliske qatysty qordaǵy jádigerler tiziminen osy sýretti kórdim. О́zim de tańǵaldym. Qundy eksponat. Ony Astanada ótken batyrdyń mereıtoıyna arnalǵan kórmege de apardyq. Jurt qyzyǵa kórdi. Bul bizdiń mýzeı úshin de bir jańalyq boldy, – dedi ol.
Avtor óz eńbeginde batyrdyń ór rýhyn kelisti kórkemdegen. Qabaǵy qatý, júzi susty. Alysqa kóz tikken janarynan otty kóresiz. Bir qaraǵanda, sýretshi buǵan 1938 jyly túsirilgen «Amangeldi» fılmindegi bas sardardy somdaǵan Elýbaı О́mirzaqovqa uqsaıtyn keıbir detal men shtrıhtardy sheber paıdalanǵan sekildi. Degenmen mazmundy dúnıeniń halyq batyryna qatysty jádigerlerdiń ishinde alar óz orny bar.
Al endi Nıkolaı Krýtılnıkov kim degenge keleıik. Ol – otandyq beıneleý óneriniń damýyna zor úles qosqan tulǵa. Qazaqstannyń halyq sýretshisi. Reseıde kindik qany tamǵanymen, bar sanaly ómiri qazaq jerinde ótken. 1921-1924 jyldary Semeı teatrynda sýretshi, sodan keıin Semeıdegi kórkemsýret stýdııasynyń jetekshisi bolǵan. 1928 jyly elimizdegi alǵashqy uıymdastyrylǵan kóshpeli sýret kórmesine belsene atsalysqan. Odan soń Almaty kórkemsýret ýchılıshesinde ustazdyq qyzmet atqarǵan. О́nertanýshylar qylqalam sheberiniń tanymal tulǵalardyń portretteri men eńbek adamdary týraly toptama sýretterin joǵary baǵalaǵan.
