Qystyń qamyn jaz oıla

Oqyrmandardyń esine sala ketetin bolsaq, byltyrǵy naýryzda osy orta­lyqtyń bir murjasy qulap, bir adam qaza taýyp, búkil qala halqynyń alańdaý­shy­lyǵyn týdyrǵan. Sodan beri qala men oblysqa jylý men jaryq beretin jalǵyz kóz – JEO-2 jumysy Úkimet pen oblys basshylyǵynyń nazarynda. Jýyrda ǵana oǵan oblys ákimi Aıdarbek Saparov ta baryp, jaǵdaıymen tanysty.

Qazir qulaǵan murjany qalpyna kel­tirý jumystary júrgizilip jatyr. Kásip­oryn jumysymen tanysqan­nan keıin Alma­sadam Sátqalıev oblys or­talyǵy­nyń belsendi turǵyndary­men, máslı­hat depýtattarymen S.Muqa­nov atyndaǵy oblystyq kitaphanada kezdesip, jaǵdaıdy baıandady jáne jınalǵandardy mazalaǵan suraqtarǵa jaýap berdi.

«Belgili apattan keıin mınıstrlik Petropavldyń JEO-2 ortalyǵyna táýelsiz sarap komıssııasyn jibergen edik. Olar barlyq teh­nıkalyq jaǵ­daı­dy anyqtaǵannan keıin ortalyqtyń jumysyn qalpyna kel­ti­rý boıynsha Jol kartasy daıyndaldy. Ony iske asyrýǵa 2022 jyly 6,3 mlrd teńge bó­linse, bıyl taǵy da 5,3 mlrd teń­ge qa­rastyryldy. Bıyl jol kartasy bes blokqa bólingen. Olardyń bári JEO jumysyn aldymyzdaǵy jylytý maý­symyna ýaqytyly, sapaly daıyndaýǵa baǵyt­taldy», dedi mınıstr.

Mınıstrdiń sózinen árbir bloktyń at­qaratyn jumysy da belgili boldy. Al­ǵash­qy blok qulaǵan №1 murjanyń ornyn tegis­teýge baǵyttalǵan. Ol ju­mys­tar bıyl to­lyq aıaqtalyp, jańa mur­­jany qalaý jumys­tary bastalyp ket­­ken. Sonymen birge osy blokta №2 mur­jany kúr­deli jóndeýden ótkizý jáne №3 murja­nyń jaǵdaıyn tolyq zertteý jumystary qamtylǵan.

Jol kartasynyń ekinshi blogy bas kor­pýsty tolyq qalpyna keltirý men №4 jáne 5-qazandyqtardyń qalyp­ty jumys isteýine múmkindik beretin gaz­dyń №2  murjaǵa ótýin qamtama­syz etetin ýaqytsha gaz qubyryn salýdy josparlaǵan. Qazir bul jumystar to­lyq aıaqtalypty. Úshinshi blok barlyq qa­zandyq jáne qosymsha jaraqtardy jóndeýdi qamty­ǵan edi. Qazir №9 jáne 11 qazandyqtardy jón­deýden basqasy tolyq aıaqtalǵan, al osy ekeýindegi jón­deý jumystary kelesi aıdyń aıaǵyn­­da aıaqtalýǵa tıisti. Eki týrbo­agregatty kúr­­­deli jóndeýden ótkizý ju­mys­tary tór­­tinshi blokta qamtylǵan. Búginde ol ju­­mystar tolyq aıaqtalǵan.

Besinshi bloktyń jumystary byltyr qulaǵan №1 murjany jańadan qalaýdy qamtıdy. Qazir bul jumys qyzý júrip jatyr. Ony aıaqtaý merzimi 2024 jyldyń 30 qyrkúıegine belgilengen.

Qazir jańa murjanyń irgetasyn qa­laý jumystary aıaqtalyp qaldy. Odan ári temir-betonnan quıylatyn murja­nyń óziniń qurylysy jalǵasady. Sonymen bir­ge ınves­tısııalyq keli­simde kórsetil­gen №2 qazan­dyq­tyń qurylysyn jańǵyr­tý jumys­taryn júrgizý de josparlan­ǵan», dedi A.Sátqalıev.

Degenmen sharýanyń bári belgilen­gen syzbamen shotqa qaqqandaı tolyq júr­gizilip jatqan joq. Mınıstrdiń aıtýyna qaraǵanda, №9 qazandyqty jón­deý jumystary syzbadan artta qalǵan. Al ­№1 qazandyqty kúrdeli jóndeý ju­mys­­ta­­ryn ınvestor 2024 jylǵa she­ge­ripti, bıyl tek aǵymdaǵy jumys­tar­dy jasamaq­shy. «JEO negizgi jab­dyq­tarynyń tozýy ­56 paıyzǵa jetkendikten kúrdeli jóndeý­di keıinge qaldyrýǵa bolmaıdy», dedi ­mınıstr. Sonymen birge oblys ákim­digi­ne kúl tógetin alańnyń jańa seksııa­syn salý úshin jer bólýdi tezdetý kerektigi aıtyldy.

Turǵyndarmen bolǵan kezdesýde A.Sát­qalıev «Sevkazenergo» AQ elektr qýatyn óndirýine eń joǵarǵy tarıfke ruqsat beril­genin atap ótti. Naqty aıtqanda, bir kvt/saǵattyń bosatylý baǵasy – 16,47 teń­ge. Bul – byltyrǵy­men salystyrǵanda bir jarym ese artyq.

PETROPAVL