Kórmege talantty sýretshiniń 80-nen astam keskindemelik jáne grafıkalyq jumysy qoıylǵan. Munda avtor óziniń balalyq shaǵynan bastap, tabıǵat sulýlyǵy men adamdar arasyndaǵy qarapaıym qarym-qatynas jáne qaladaǵy ózimiz baıqaı bermeıtin qym-qýyt tirshilikti qylqalam tilimen kórkem sóılete bilgen. Kartınalarynyń boıaýy qanyq, obrazǵa baı. Ásirese qylqalam sheberiniń «Dala korrıdasy», «Botanıkalyq baq» atty sıkldi toptamasynan bastap, «Tereze aldynda», «Kúzgi terek», «Túngi qala», «Aıly tún», «Kúnniń batýy», «Eski jol», «Avtoportret», «Jýsan» sekildi maıly boıaýmen salǵan eńbekterinen onyń jan-dúnıesiniń tazalyǵy men ónerge degen adaldyǵyn tap basyp tanısyz. Sondaı-aq týyndygerdiń adamdy qııal álemine jeteleıtin sáýlet ónerindegi kompozısııalary da ásemdigimen kóz tartyp, baýrap áketedi.
Mádenı is-sharanyń ashylýynda tanymal sáýletshi Serik Rústembekov pen qoǵam qaıratkeri Darhan Myńbaı kórme ıesiniń san qyrly talantyna toqtalyp, onyń kásibı sáýletshiligi men sýretshiligi týraly sóz qozǵady. Sýretshiler odaǵy Astana qalasyndaǵy fılıalynyń tóraǵasy Qońyr Muhamedıev jyly lebizin jetkizdi. Belgili sýretshi Qalıolla Ahmetjan áriptesin sáýlet pen beıneleý ónerinde óz qoltańbasy bar, erekshe talant ıesi dep baǵalady.
Is-shara sońynda sóz alǵan Berik Moljigit kórmege 1993 jyl men 2013 jyl aralyǵyndaǵy týyndylarynyń eń tańdaýlysy usynylǵanyn aıtty.
«Menen kópshilik «Siz sýretshisiz be, álde sáýletshisiz be?» dep suraıdy. Shynymdy aıtsam, boıymdaǵy eki ónerimdi «mynaý – artyq, anaý – kem» dep bóle almaımyn. Árkim ózine unaǵanyn kóredi. Ártúrli stılde jumys istegendi unatamyn. Bir stılde 10-15 jyl jumys istegennen keıin ony ári qaraı jalǵastyra almaımyn. Qysqasy, kóńilim neni qalaıdy, sony isteımin», dep kórmege kelgen qaýymǵa rızashylyǵyn bildirdi.
Kórme 6 tamyzǵa deıin jalǵasady.
