«Qor 1,2 trln teńge somaǵa jeńildetilgen tarıfter men baǵalardy usyna otyryp, Qazaqstan ekonomıkasyn sýbsıdııalaıdy. Bul uzaq ýaqyt boıy jetkiliksiz qarjylandyrýǵa jáne sáıkesinshe ınfraqurylymnyń tozýyna ákeledi. Prezıdent ótken jyly «Investısııalar ornyna tarıf» baǵdarlamasyn iske asyrýdy tapsyrdy. Qazir biz Úkimetpen jáne Prezıdent Ákimshiligimen tarıfterdi josparly túrde arttyrý úshin jumys istep jatyrmyz. Mindetimiz – maqsatty ınflıasııalyq dáliz sheginde tarıfterdiń ósýin 10-12% deńgeıinde saqtaý jáne áleýmettik turaqtylyqty qamtamasyz etý», dedi Qor basshysy.
Qazirgi ýaqytta myna kompanııalarǵa qatysty tarıfterdi ózgertý kelisilgen:
- «QazMunaıGaz» UK» AQ – janar-jaǵarmaıdyń (JJM) kóterme baǵasyn ósirý;
- «QazaqGaz» UK» AQ – gazǵa kóterme jáne bólshek baǵany kóterý;
- «Samuryq-Energo» AQ – elektr energııasyn óndirýge tarıf;
- «Qazaqstan temir joly» UK» AQ – magıstraldyq temirjol jelisi qyzmetteriniń tarıfi.
Magıstraldyq sý qubyry arqyly sý berý, gaz tasymaldaý, jylý energııasy, tranzıt jáne eksport, lokomotıvtik tartym boıynsha tarıfterdi ózgertý máselesi pysyqtalyp jatyr eken.
Onyń sózinshe, qor jumys isteýge tıis ózekti sektor – ekonomıka qorlaryn sýbsıdııalaý baǵyty.
«Ol tarıfter men baǵalar ózindik qunnan tómen bolatyn qyzmet salalarynda týyndaıdy. Mysaly, temirjol tasymalynda biz ekonomıkaǵa 236 mlrd teńge dotasııa jasaımyz, al «QazaqGaz» UK» AQ gaz baǵasy arqyly ekonomıkany 178 mlrd teńgege dotasııalaıdy. Bizge dotasııalanǵan tarıften arylý kerek. Tek sonda ǵana eskirgen jelilerdi jańartyp, jańa elektr stansalaryn salyp, energııany únemdeýde jáne halyqty jylýmen qamtamasyz etýde problemalarǵa kezikpeıtin bolamyz», dedi.
«Samuryq-Qazyna» basshysynyń aıtýynsha, dotasııalanǵan tarıfterden qutylyp, naryqtyq baǵaǵa kóshý arqyly ǵana ınvestor tarta alamyz.
«Bıznes, energetıka, óndiris, transport, otyn sektory bolsyn, eger taýardyń baǵasy ádil bolmasa, eshqandaı ınvestor kelmeıdi. О́zindik qunynan tómen baǵadaǵy taýarmen ınvestorlardy qyzyqtyrý múmkin emes. Eger bizdegi bekitilgen tarıf josparly eskertý jumystaryn der ýaqytynda atqarýǵa, ınfraqurylymdy modernızasııalaýǵa múmkindik bermese, onda ol erte me, kesh pe buzylady. Qazirgi tarıfter qordyń ǵana emes, el ekonomıkasynyń damýyn da tejep tur. Alaıda bul rette tarıfti kóterý boıynsha shuǵyl áreket jasaýǵa bolmaıdy. Jyl saıyn 10-12 paıyzǵa joǵarylap otyratyn túsinýimiz kerek. Tarıfterdi ózgertý óte qıyn, biraq ekonomıkaǵa serpin beretin asa qajetti qadam», deıdi.
Qor basshysynyń túsindirýinshe, byltyr tarıfterdi joǵarylatý energetıkalyq júıeniń senimdiligin arttyrýǵa qatysty birqatar túıtkilderdi tarqatty.
«Mysaly, Moınaq GES-iniń qurylysy arqasynda stansanyń qýattylyǵy 1,6 Gıgavattqa artty nemese bul – energııa júıesiniń jalpy qýattylyǵynyń 10 paıyzy. Tarıfti ózgertýmen jumys isteý birshama qarajatty ınfraqurylymdyq jobalardy damytýǵa jumsaýǵa múmkindik beredi. «Investısııalar ornyna tarıf» baǵdarlamasymen «Samuryq-Energo» Ekibastuz GRES-2 úshinshi blogyn turǵyza alady. Onyń iske qosylý ýaqyty 2026 jylǵa josparlanyp otyr. Sonymen qatar 2029 jyly Ekibastuz GRES-3 qurylysyn bastaý josparlanyp otyr. QazaqGaz-daǵy artylǵan qarajat geologııalyq barlaýǵa jáne tozý kólemin azaıtý úshin gaz transporty júıesin modernızasııalaýǵa jiberiledi», dedi.
Nurlan Jaqypov jańa jumys oryndaryn qurýda sheteldik seriktestermen tize qosyp jumys isteýdiń mańyzdylyǵyna toqtaldy. Onyń aıtýynsha, tájirıbesi men bedeli joǵary sheteldik seriktesti tartý táýekel deńgeıin tómendetip, qolda bar resýrsty tıimdi bólistirýge jaǵdaı jasaıdy. Sonyń arqasynda birneshe jobany bir ýaqytta tıimdi júzege asyrýǵa bolady.
