Astana 60 myń adamǵa jumys usynady

Áleýetti jumys berýshiler qata­rynda «Qazposhta», «Qazaq­stan temir joly», «Samuryq-Qazyna», ERG, bank­ter, meduıymdar, oqý ortalyqtary jáne basqa da mekemeler bar. Jalpy, túrli qyzmet salasynda 1300-den astam bos jumys orny usynylǵan. Jármeńkeni «Amanat» partııa­sy qala ákimdigimen bir­lese uıymdastyrdy.

«Qalamyzda turǵyndardy, onyń ishinde túlekter men jas­tardy jumysqa orna­las­t­y­rý­ǵa arnalǵan birqatar baǵ­dar­lamany júzege asy­ryp jatyrmyz. Máselen, bıyl bıznes, ákimdik jáne bilim berý ınstıtýttarynyń ynty­maq­tas­tyǵynyń arqasynda 60 myń jumys ornyn qurýdy josparlap otyrmyz», dedi Astana qalasynyń ákimi Jeńis Qasymbek.

Is-sharaǵa qatysqan «Amanat» partııasynyń tóraǵasy Erlan Qoshanov jastardy jumysqa ornalastyrý – Prezıdent pen partııanyń saılaýaldy baǵ­dar­la­masynyń mańyzdy mindeti ekenin aıtty.

«Maqsatymyz – 2029 jylǵa deıin 2,3 mıllıon jas­ty ju­mys­qa ornalastyrý. Sol úshin partııanyń «Jastar rýhy» jas­tar qanaty «Jastarǵa jumys» jobasyn júzege asyra bastady. Muny jumysqa ornalasýdyń keshendi tásili deýge bolady. Barlyq óńir boıynsha bos oryndar jármeńkelerin turaqty ótkizýmen birge jyldyq 2,5% nesıe berý, taý-ken óndirý ónerkásibinde 2 myń bos jumys ornyn qurý, jas mamandardy IT-daǵdylaryna úıretý úshin 3 myń vaýcher bólý jáne taǵy basqa da kóptegen múmkindik berildi. Búgin jastar qaýymy kóp jınalatyn elordalyq Arbatqa 70-ten astam jumys berýshi keldi. 2000-nan astam adam qatysty. Bul jastar úshin alǵashqy eńbek jolyn iri de senimdi kompanııalardan bastaýǵa úlken múmkindik beredi», dedi Erlan Qoshanov.

«Amanat» partııasy janyndaǵy «Jastar rýhy» jastar qana­ty­nyń tóraǵasy Nurjan Jet­pis­baev­tyń aıtýynsha, jyl basynan beri 120-dan astam jármeńke ótkizilgen.

«Bul tek qana oblys orta­lyq­tary ǵana emes, elimizdiń oblys ortalyqtaryna úzeńgiles shaharlar, basqa da kishkentaı aýyldyq mekenderde ótkizdik. Jalpy, bizdiń esepteýimizshe, 90 myńnan astam azamat bizdiń jármeńkelerimizge kelip, 18,6 paıyzy jumysqa ornalasqan. Biz aldyn ala anons jasaǵan kezde jáne aldyn ala habarlandyrý jasaǵan kezde muǵalim, densaýlyq saqtaý salasyndaǵy mamandardyń jumys tapshy­ly­ǵyn sezdik. Jármeńke jas­tar­dyń kásibı, eńbek jáne kásip­kerlik áleýetin iske asyrý­ǵa kómektesýdi kóz­deı­di. Sáı­kesinshe, mem­le­ket­tik organdardyń mamandary keńes berdi», dedi N.Jetpisbaev.