24 balany dúnıege ákelgen ana búginde beınetiniń zeınetin kórip otyr. Jetisaı aýdanynyń Qaraózek eldimekeninde turatyn kópbalaly batyr ana elimizdiń jetken jetistikteri men alǵan asýlaryna tileýles jan. Eńbekke jastaıynan aralasyp, erte eseıgen aq jaýlyqty ananyń jastarǵa aıtatyn ósıeti jeterlik.
«Adamdy adam etken - eńbek» deıdi. Jas kezimizden eńbekpen shuǵyldandyq. Joldasym Jolaman ekeýmiz sovhozdyń malyn baqtyq. Mal sharýashylyǵynda otaǵasy aǵa shopan, men kómekshisi bolyp istedim. Januıaly bolyp, 24 balany dúnıege ákeldik. О́kinishke qaraı, ómirdiń túrli synaǵyna tap bolyp, 12 balam qaıtys boldy. Allaǵa shúkir deımin, qalǵanynyń barlyǵyn aıaqtandyrdyq, qatarynan kem qylmadyq. Nemere, shóbere súıip otyrmyz. Balalarymyzdy jaqsy tárbıeleýge tyrystyq, eńbekti súıip ósirdik. Mańdaı termen tabylǵan nan qashanda tátti», – deıdi qart ana.
Saparkúl apa búginde 70 nemere men 20 shóberesiniń qyzyǵyn kórip otyr. Bir ret úshemderdi, eki ret egizderdi dúnıege alyp kelgen aıaýly ana alǵash «Batyr ana» medalin 1979 jyly 17-shi perzentin dúnıege ákelgende alypty. Al ekinshi «Altyn alqasy» omyraýyna táýelsizdik tańy atqan soń taǵylypty.
Qazir ul-qyzdary qosaqtarymen áýlettiń dáýletin asyryp, altyn qursaqty ananyń aq batasymen urpaq órbitip otyr. Memleket basshysy Qasym-Jomart Kemelulynyń jastarǵa, agrarlyq sektorǵa, kásipkerlerge jasaǵan qamqorlyǵynyń arqasynda shańyraqtan bereke alystaǵan emes. Saparkúl apanyń perzentteri Astana, Almaty, Shymkent qalalary men Túrkistan oblysynda óz isteriniń sheberi atanyp, kásipterin dóńgeletip, násipterin taýyp júr.
Batyr ana joldasy ekeýi búginde kenje uldarynyń shańyraǵynda turady.
