Bizdiń búgingi áńgimemizge arqaý bolyp otyrǵan polısııa kapıtany Baýyrjan Omarov ishki ister organdaryna osy úshinshi toptaǵy adamdar qatarynda kelgen. Bala kúninen ol tártip saqshysy bolýdy arman qylmasa da, eseıe kele bul salaǵa ózi sekildi jigerli de talapty, aldyna naqty maqsat qoıa biletin jigitterdiń kerektigin sezinip, beldi bekem býǵanyn aıtady.
«Eń alǵash stýdenttik jyldary polısııa qyzmetkeri bolsam degen oı kelgen edi. Birinshiden, bizdiń áýletten eshqashan polısııa qyzmetkeri shyqpapty. Naǵyz myqtylar men bilektilerge arnalǵan bul salada áýletimizden de bir adamnyń bolǵany durys dep sheshtim. Ekinshiden, polısııa – bıliktiń ókili ekeni ras. Oqaly kıim kıip, qoǵam tártibin qadaǵalap, quqyq buzýshylyqtar men qylmystyń aldyn alý jolynda eńbek etýdi shyndap qaladym», deıdi polısııa kapıtany.
Osy maqsatyna jetý úshin Baýyrjan Omarov oqýdy bitirisimen óz erkimen Otan aldyndaǵy boryshyn óteýge attandy. Bul 2006 jyl bolatyn. Arqanyń jigiti kıeli Aqtóbe jerinde bir jyl áskerı mindetin oryndap, 2007 jyly týǵan jerge orala salysymen polısııaǵa qyzmetke turý qamyna kirisip ketedi.
«2008 jyldyń basynda qujattarymdy jınaǵan soń, meni ishki ister organdaryndaǵy alǵashqy daıarlyq mektebine 3 aılyq oqýǵa jiberdi. Ony aıaqtaǵannan keıin birden Astana qalalyq Ishki ister departamenti Patrýldik polısııasyna qyzmetke alyndym», deıdi tártip saqshysy. Baýyrjan Kenjeǵalıuly qyzmet atqara júrip, 2012-2014 jyldary Kókshetaý qalasyndaǵy Kókshe akademııasyn zańtanýshy mamandyǵy boıynsha syrttaı oqyp bitiredi. 2015 jyly ishki ister organdaryndaǵy qurylymdyq ózgeristerden keıin Jol jáne patrýldik polısııasy qosylyp, Jol-patrýldik polısııasy qurylǵan soń, Baýyrjanǵa «polısııa leıtenanty» degen alǵashqy ofıserlik shen berildi.
Ishki ister salasyna eń alǵash táı-táı basqan sol ýaqyttardan beri de 15 jyl zýlap óte shyǵypty. Bul kúnde Astana qalasynyń PD Patrýldik polısııa polkiniń qyzmet aǵa ınspektory, polısııa kapıtany Baýyrjan Omarov ońy men solyn tanyǵan, qyzmetiniń qyr-syryn meńgergen, ishki ister salasynyń uńǵyl-shuńǵylyn jetik biletin tájirıbeli mamanǵa aınalǵan. Ýaqytpen sanaspaı, kúndiz de, túnde de qyzmet ornynan tabylyp, talaı quqyq buzýshylyqtar men qylmystardyń aldyn alyp, kúresip júrgen polısııa qyzmetkeri úshin bul az ýaqyt emes, árıne.
Talaı jyl tájirıbe jınaqtaǵan Baýyrjannan «Qazirgi kúni óz qyzmetiń saǵan nesimen unaıdy?» dep suradyq. «Polısııa qyzmetkeri bolý – tek pogon taǵyp júrý emes. Sen árdaıym, ár mınýtta aınalańnyń bárine jiti qarap, zań aıasynan shyqqan kez kelgen áreketti qalt jibermeı baqylaýda ustaýyń qajet. Quqyqqa qaıshy áreket istegen buzaqymen nemese qylmyskermen betpe-bet kelgende sheshim qabyldaý úshin tártip saqshysy fızıkalyq turǵyda qýatty, shynyqqan bolýy shart. Sol sebepti biz aptasyna úsh márte jattyǵý zalynan tabylamyz. Maǵan unaıtyny da osy. Biz árdaıym sportpen shuǵyldanamyz. Kúsh-qýatymyzdyń jetkilikti bolýyn qadaǵalaımyz. Sporttyń arqasynda únemi ózimizdi jeńil ári sergek sezinemiz. Munyń polısııa qyzmetkerine, tipti kez kelgen adamǵa paıdasy mol», dep jaýap berdi.
Iá, rasymen de, polısııada qyzmet etý bir jaǵynan abyroıly mindet bolsa, ekinshi jaǵynan, qaýipti jumys ekeni málim jaıt. «Kún saıyn qyzmette júrgende bizge ártúrli shaqyrtý túsedi, deıdi polısııa kapıtany. – Ásirese, otbasylyq janjaldarǵa jıi baramyz. О́kinishke qaraı, otbasynda kúıeýi men áıeli túsinise almaı, janjal týyndap, polısııa shaqyryp jatatyndar az emes. Urlyq-qarlyq, tóbeles sekildi quqyq buzýshylyq oqıǵalary óz aldyna bir tóbe. Otbasylyq janjaldarda eki jaqty tatýlastyryp, sabyrǵa shaqyryp, profılaktıkalyq jumystar júrgizemiz. Bizdiń tatýlastyrý sharalarymyzdan keıin otbasyndaǵy urys-keris basylyp, ózara tabysyp, artynan habarlasyp alǵystaryn aıtyp jatatyndar az emes.
Osy uzaq jylǵy qyzmetten meniń oıǵa túıgenim: polısııa qyzmetkeri eń birinshi psıholog bolýy kerek eken. О́ıtkeni ártúrli shaqyrtýǵa barǵanda ol jerdegi adamdy bir kórgennen-aq onyń pıǵylyn «tanyp-bilip», sáıkesinshe ózińniń qalaı áreket jasaıtynyńdy tez arada josparlap úlgerýiń kerek. Jaǵdaıdyń qalaı sheshimin tabýy seniń jedel shyǵarǵan sheshimińe tikeleı baılanysty».
Biz Baýyrjan Omarovpen suhbattasý barysynda jalǵyz ózi qylmyskerdi izin sýytpaı ustap, jábirlenýshige járdemdeskenin bildik. Bul osydan 4-5 jyl buryn oryn alǵan oqıǵa. Túngi saǵat 00:00 shamasynda Astananyń ortalyq saıabaǵynda qyzmet atqaryp júrgen tártip saqshylaryna Jedel baqylaý ortalyǵynan «Dýman» oıyn-saýyq kesheni mańynda belgisiz bir jigit telefonmen sóılesip turǵan qyzdyń sómkesin julyp alyp, Turan kóshesine qaraı qashty» degen jedel baǵdarlaý keledi. «Syrtqy belgileri: uzyn boıly, jińishke kelgen, qara kúrteshe men sur trıko kıgen degen málimet berildi. Men ortalyq saıabaqta júrip aǵashtardyń arasynan túr-túsi sol uryǵa keletin bir adamdy kórip qaldym. Oǵan artqy jaǵynan taıap kelgende urynyń týra ózi ekendigine eshqandaı kúmánim qalmady. Qashyp ketpeýi úshin aldymen odan sirińke suradym. Ol qaltasyna qolyn salyp, sirińke ala bergende tap berip, tyrp etkizbeı ustaı aldym», deıdi B.Omarov.
Alǵashynda jigit óziniń bul qylmysqa qatysy joqtyǵyn aıtyp azar da bezer bolady. Alaıda Baýyrjan radıobaılanys arqyly jábirlenýshini sol jerge aldyryp, ol uryny jazbaı tanyǵannan keıin qara kúrtesheli jigit óziniń zańǵa qaıshy isin moıyndaıdy. Dereý jetken rota basshylary, jedel tergeý toby qyzmetkerleri jigittiń sómkeni laqtyryp kettim degen jerine barady. Sol oryndy jarty saǵattaı tintkilep, keıin kınolog ıtterdiń kómegimen sómke tabylyp, ıesine qaıtarylady.
Mine, bul – tártip saqshylarynyń kúndelikti qyzmetinde kezdesip jatatyn qatardaǵy oqıǵalardyń biri. Degenmen qylmyskerdi jalań qolmen ustaýdyń ózi kez kelgen adamnyń qolynan kele bermeıtin is ekeni ras. Ol buzaqynyń qolynda pyshaq sekildi sýyq qarýy da bolýy múmkin. Seni óltirmese de, jaraqattap ketýi ǵajap emes. Biraq adamdardyń qaýipsizdigin oılaǵan polısııa qyzmetkerleri eń aldymen óz ómirin emes, ózgeniń tynyshtyǵyn birinshi orynǵa qoıatyny belgili jaıt. Sol tabandylyǵymen de olar árdaıym qurmetke laıyq.
