«Túrki oshaqtary» qoǵamdyq uıymy 1912 jyly qurylyp, sodan beri jumys istep keledi. Maqsaty – túrki tektes halyqtardyń birligin saqtap, olardyń rýhanııaty men mádenıetin nasıhattaý. Negizinen uıym músheleri – zeınetkerler. Olardyń arasynda buryn memlekettik qyzmet atqarǵan qoǵam qaıratkerleri, pedagogter, ınjenerler, áskerı azamattar, qysqasy, barlyq salanyń mamandary bar. Kezdesýde aýdarmashylyq qyzmetti Ǵylym jáne joǵary bilim mınıstriniń keńesshisi Rahymbek Jolaev sátimen atqardy.
Alystan at arytyp kelgen qonaqtardy jyly qarsy alǵan «Qazaq gazetteri» JShS bas dırektory, akademık Dıhan Qamzabekuly seriktestiktiń qyzmeti men ǵasyrdan astam tarıhy bar «Egemen Qazaqstan» men «Kazahstanskaıa pravda» basylymdary týraly keńirek maǵlumat berdi.
– «Egemen Qazaqstan» – elimizdegi bas gazet. Basylym tarıhy 1919 jyldan bastalady. Osydan tórt jyl buryn júz jyldyǵyn atap óttik. Bul gazetti basqarǵan azamattardyń birazy otyzynshy jyldardaǵy qýǵyn-súrgin qurbany boldy. Bıyldan bastap «Qazaq gazetteri» bolyp qurylyp, oǵan elimizde shyǵatyn 12 gazet-jýrnal biriktirildi. Biz Túrkııa elimen óte jaqyn baılanystamyz. Odan ári de tyǵyz baılanysta bolǵymyz keledi. Túbimiz bir jurtpyz. Túrkııanyń medıa salasyndaǵy tájirıbesi, sol salada qyzmet isteıtin mamandardyń izdenisteri bizge qajet. Qazir bizdiń jýrnalıster, ásirese jas jýrnalıster Túrkııaǵa baryp, tájirıbe úırengisi keledi, – dedi bas dırektor.
Odan keıin sóz alǵan «Túrki oshaqtary» qoǵamdyq uıymy Antalııa fılıalynyń tóraǵasy Abdýlla Koısar izgi iltıpat kórsetken basylym basshylyǵyna rızashylyǵyn bildirip, bizdiń elden alǵan áserimen bólisti.
– Qazaq halqy jetpis jyldan asa ýaqyt keńes odaǵynyń quramynda bolǵanymen, ulttyq bolmysy men salt-dástúrin, mádenıetin joǵaltyp almaǵan. Táýelsizdik alǵannan keıingi keıingi otyz jyldaǵy jetken jetistikterińizge kóńilimiz tolady. Ony ózimiz kózimizben kórip otyrmyz. Bizdiń maqsatymyz – álemniń qaı jerinde túrki jurty bar, solarmen jaqyn aralasyp, ádebıetimizdi, mádenıetimizdi dáripteý. Qazaq elindegi ulttyq ıdeıany murat tutqan Alash azamattary týraly kóp estidim. Biz túrikterdiń alash-ordashylarymyz. Qysqasy, jer betindegi túrki halyqtarynyń birligin qalaı qalyptastyramyz degen ıdeıanyń jolynda júrgen azamattarmyz, – dedi ol.
Kezdesýde qonaqtar eki eldiń tarıhy men rýhanııaty, ádebıeti, mádenıeti taqyrybynda sóz qozǵap, erkin áńgime órbitti. Aýdarma máselesi týraly jaqsy oılar aıtyldy. Qazaq zııalylary jaıyndaǵy kóptegen tyń derekke qanyqty.
«Astanadaǵy «Báıterekke» shyǵyp, qolymyzdy qoıyp, túrki halyqtarynyń birligine qyzmet isteımiz dep ant berdik. Biraq bir-birimizdiń tilimizdi qınalyp túsinemiz. Osy kedergini qalaı joıamyz? Álde bir-birimizge jıi kelip, jaqyn aralasýymyz kerek pe?» degen qonaq saýalyna Dıhan Qamzabekuly: «Búgin bir-birimizdi túsinip otyrmyz. Alaıda biz bir-birimizdi jaqyn túsinýimiz úshin aıtýly tulǵalarymyzdy tanytyp, eki halyqqa ortaq dúnıelerdi kóp nasıhattaýymyz kerek», dep jaýap berdi.
Sondaı-aq kezdesý barysynda Abdýlla Koısar bıyl Túrkııada bolǵan jer silkinisine úlken qoldaý kórsetken qazaq halqyna rızashylyǵyn jetkizdi. «Túrik oshaqtary» qazaq klassıkalyq ádebıetin túrik tiline aýdarýǵa atsalysatynyn málimdedi.
