Jánibekke jańa qarsylas tabyldy

Kásipqoı bokstaǵy alǵashqy aıqasyn 2016 jyly ótkizse de, 2018 jyldan bastap atalǵan sport túrine den qoıǵan otandasymyz ótken jyly WBO nusqasy boıynsha orta salmaqtaǵy (72,6 kg) álem chempıony ataǵyn jekpe-jeksiz jeńip alǵan bolatyn. 2021 jylǵa deıin WBO belbeýin ıelenip kelgen amerıkalyq De­met­rıýs Andrade 2021 jyldyń so­ńyn­da chempıondyq ataqqa min­detti úmitker bolǵan Jánibek Álim­han­ulymen jekpe-jekke shyǵý­dan jáne belbeýin qorǵaýdan birne­she ret bas tartty. Aqyr sońyn­da Andrade sýper orta salmaqqa ­aýysatynyn aıtyp, Dúnıejúzi­lik boks uıymynyń chempıondy­ǵy­nan bas tartatynyn jarııala­dy. Sóıtip, bul belbeý eshqandaı aıqassyz otandasymyzdyń ıyǵy­nan tabyldy.

Osydan keıin Jánibek 2022 jyldyń kúzinde brıtandyq boks­shy Denzel Bentlımen betpe-bet kelip, alǵash ret mindetti álem chem­pıony ataǵyn sátti qorǵady. 12 raýnd­­qa josparlanǵan jekpe-jekti eki boksshy tolyq judyryqtasyp shy­ǵyp, tóreshilerdiń biraýyzdan qabyldaǵan sheshimimen Jánibek Álimhanuly jeńimpaz dep tanyldy. Keıinnen otandasymyz osy jyldyń mamyr aıynda WBO belbeýin ekinshi márte qorǵady. Bul joly ol 2017 jyly Gennadıı Golovkın men Saýl Alvares arasyndaǵy alǵashqy jekpe-jektiń aldynda «Kanelonyń» sparrıng-seriktesi bolǵan kanadalyq Stıven Batlermen qolǵap túıistirdi.

AQSh-tyń Stokton qalasynda ótken boks keshi de 12 raýndqa bel­gilengenimen, jekpe-jek uzaq­qa sozylmady. Barlyq máse­le ekinshi raýndta sheshildi. Álim­han­uly áýeli qarsylasyn eki ret nokdaýnǵa jiberip, keıinnen qarsylasyn apperkot soqqysy­men taǵy bir eseńgiretip aldy da, sol qolymen qulaqshekeden urdy. Nokaýt! Osylaısha, Álimhanuly óziniń sporttyq mansabyndaǵy 14-jeńisin toılap, chempıondyq ataǵyn ekinshi márte sátti qorǵady.

30 jastaǵy brıtanııalyq je­ńil­megen boksshy Felıks Kesh osy jyldyń alǵashqy toqsanynda amerıkalyq Ostın Ýılıamspen orta salmaqtaǵy WBA belbeýi­ne mindetti úmitker atanýy úshin jekpe-jek ótkizýge tıis edi. Alaıda sol kezde WBA chempıo­ny bolyp turǵan Gennadıı Golovkın bel­beýden bas tartatynyn málimde­gen soń, eki boksshynyń promoýter­leri bul aıqasty uıymdastyrýǵa asa nıetti bola qoımady. О́ıtke­ni esimderi boks jankúıerlerine ­endi tanylyp kele jatqan úmitker­ler arasynda jeńiske jetken eki boksshynyń biri GGG-men shar­shy alańda kezdesýge tıis edi. Al bul óz kezeginde jeńimpaz atan­ǵan boksshy úshin ájeptáýir tany­maldyqqa ıe bolatyn oraıly sát bolatyn. Sóıtip, eki promoýterdiń de, boksshylardyń da josparlary iske aspaı qaldy.

«Kesh Ýılıams utymdy usy­nys­tan bas tartpaıdy dep oılaı­myn. О́ıtkeni ol maǵan únemi úz­dik­termen judyryqtasýǵa daıyn ekenin aıtyp keledi. Sondaı-aq oǵan úlken jekpe-jekter ótkizetin ýaqyt keldi dep esepteımin. Qazirgi tańda bizdiń qolymyzda álem chempıony Jánibek Álimhanulymen judyryqtasý týraly usynys hat bar. Naqty sheshimdi jaqyn arada qabyldaımyz», dedi Eddı Hırn.

Brıtanııalyq boksshy da Jáni-
bektiń usynysyna ket ári emes se­kildi. Eger eki tarap ortaq má­mi­lege kelse, jer-jahannyń jan­kúıerlerin alda taǵy bir qyzyq­ty aıqas kútip tur deýge bolady. Kesh Ýılıams óziniń áleýmettik jelidegi paraqshasynda osy jekpe-jekke qatysty arnaıy post jazdy. «Eger Jánibek Álimhanuly menimen ju­dyryqtasqysy kelse, men qarsy emes­pin. Eddı Hırn, bul jekpe-jekti uıymdastyraıyq», deıdi ol.

1993 jyly Anglııanyń Chertsı qalasynda dúnıege kelgen Kesh Ýılıams kásipqoı boks sharshy alańynda 2016 jyldan beri judy­ryqtasyp keledi. Ol óziniń kásibı mansabyndaǵy debıýttik aıqasyn 2016 jyldyń 25 maýsymynda Entonı Djoshýa men Domınık Brızıl arasyndaǵy boks keshiniń anderkardynda ótkizip, Iаılton Nevesti upaı sanymen qapy qal­dyrdy.

Sondaı-aq brıtanııalyq boks­shy alǵashqy 9 jekpe-jeginiń altaýynda merziminen buryn je­ńis­ke jetip, á degennen boks maman­darynyń nazaryn ózine aýdardy. 2018 jyly ol kásipqoı bokstaǵy alǵashqy belbeýine de qol jetkizip, chempıondyq ataqtyń tátti dámin tatty. Londondaǵy Copper Box Arena sport kesheninde ótken boks keshinde ol nıderlandtyq Stı­ven Danony da upaı sanymen utyp, WBC International Silver orta salmaqtaǵy álem chempıo­ny ataǵyn ıelendi. Kásipqoı boks­ta júrgen otandastarymyzdyń jekpe-jekterin únemi baqylap, nazardan tys qaldyrmaı júre­tin jankúıerlerdiń esinde bolsa, 2021 jyldyń basynda orta sal­maq­ta judyryqtasatyn taǵy bir jerlesimiz Sadrıddın Ahmedov dál osy Stıven Danomen Mek­sı­ka sharshy alańynda judyryqta­syp, tóreshiler sheshimimen jeńis­ke jetken bolatyn.

Sondaı-aq Kesh Ýılıams 2021 jyldyń sáýir aıynda Jánibek­tiń buǵan deıingi qarsylasy Den­zel Bentlımen de kezdesip, ony úshinshi raýndta-aq sulatyp salǵan edi. Kesh eń keıingi aıqa­syn ótken jyldyń jeltoqsan aıyn­da portýgalııalyq Selso Nevespen (9-4-2, 2 KO) ótkizip, upaı sany­men jeńiske jetken. Mine, brıtanııalyq boksshynyń ázirge kásipqoı bokstaǵy bar tabysy osy ǵana.