Foto: Mańǵystaý oblysynyń ákimdigi
Mańǵystaý oblysy ákiminiń baspasóz qyzmeti habarlaǵandaı, Túpqaraǵan aýdanyndaǵy Aqshuqyr aýylynda «Jeti laq» fermasynyń negizin qalaýshy Kobzevter otbasy eshki men túıe sútinen irimshik ónimderin shyǵarýmen aınalysady. Bıyl olar Le Mondial du fromage-2023 halyqaralyq irimshik baıqaýyna qatysady. Erekshe atap óterligi, atalmysh halyqaralyq konkýrsqa Qazaqstannan úmitkerler buryn-sońdy qatyspaǵan.
«Jeti laq» fermasy halyqaralyq irimshik baıqaýynda Qazaqstannyń ónimderin tanystyrady. Bul qazaqstandyqtardyń konkýrs uıymdastyrýshylarynan akkredıtasııa alǵan alǵashqy jaǵdaı.
2020 jyldan bastap jumys isteıtin «Jeti laq» fermasy pasterlengen eshki sútin, ıogýrt, aıran, súzbe, qaımaq jáne irimshiktiń 12 túrin shyǵarady. Kobzevter otbasy aıyna 3,5 tonna eshki sútin óndiredi. 10 ga aýmaqty alyp jatqan fermanyń tórt gektary eshki ósirýge arnalsa, qalǵan aýmaǵynda jem-shóp qoımasy men sút óńdeý sehy ornalasqan.
Fransýzdyq Le Mondial du fromage baıqaýy qyrkúıek aıynyń 10-12 kúnderi aralyǵynda Týr qalasynda ótedi.
