Elimizdegi júk tasymaly aınalymynyń 50 paıyzdan astam úlesi Qazaqstan temir jolyna tıesili. Sala boıynsha ótken jyldyń osy kezeńimen salystyrǵanda qatysty negizgi óndiristik kórsetkishterdi oryndaýdyń oń dınamıkasy baıqalady. Bıylǵy jyldyń
6 aıynda tarıftik júk aınalymy 130,4 mlrd tonna km nettony quraǵan, bul ótken jylǵy deńgeıden 8,6%-ǵa joǵary. Tranzıttik júk aınalymy 39,1%-ǵa ósip, 27,8 mlrd tonna-kılometr nettoǵa jetken. Konteınerlik tranzıt 26%-ǵa ósken. Qazaqstannan Qytaıǵa eksporttyq júkterdi tasymaldaýdyń ósimi qamtamasyz etilip, kólemi 5,7 mln tonnadan asty. Bul ótken jylǵy deńgeıden 27%-ǵa artyq.
Jolaýshylar aınalymy 5,7 mlrd jolaýshy-km, bul 2022 jylǵy derekten 1,2% joǵary. Jyldyq jolaýshylar temirjol tasymalynyń úshten biri jazǵy kezeńge keledi, kórsetkish jyldyq jolaýshylar aınalymy jalpy úlesiniń 32%-yn quraıdy. 2023 jyldyń 1 maýsymy men 20 shildesi aralyǵynda «Jolaýshylar tasymaly» AQ poıyzdarymen 2,1 mln astam adam tasymaldanǵan. Jalpy, 2022 jyly Ulttyq tasymaldaýshy poıyzdaryn 13,9 mln jolaýshy paıdalandy. О́tken jyly jazdyń úsh aıynda 4,4 mıllıon jolaýshy (aıyna bir mıllıonnan astam jolaýshy) tasymaldandy. Kúzgi kezeńde tasymaldaý úlesi 23% nemese 3,3 mln jolaýshyny, qysqy kezeńde 20% nemese 2,8 mln jolaýshyny, kóktemgi kezeńde 25% nemese 3,4 mln jolaýshyny quraıdy. Temirjol jelisi boıynsha 14 tasymaldaýshy qyzmet kórsetetin 140 marshrýt turaqty júredi.
Esepti kezeńde shamamen 600 km temirjol jóndeldi, bul ótken jylǵy kezeńnen 100 km artyq. Osy jyly jóndeý jumystarynyń barlyq túri boıynsha 1 126 km magıstraldi saýyqtyrý josparlanýda. Dostyq – Moıynty ýchaskesinde ekinshi joldardyń qurylysy qarqyndy júrip jatyr.
Jyljymaly quram parkin jańartý boıynsha jumystar da júıeli júrgizilýde. 36 lokomotıv, 48 fıtıngtik platforma jáne 14 jolaýshylar vagony satyp alyndy. Jyl sońyna deıin taǵy 139 lokomotıv, 620 júk jáne 50 jolaýshylar vagony jetkiziledi dep kútilýde.
Keńeste qozǵalys qaýipsizdigin qamtamasyz etý jáne eńbekti qorǵaý máseleleri erekshe sóz boldy. Qozǵalys qaýipsizdigin buzǵany úshin birqatar mamandarǵa tıisti tártiptik jaza qoldanylyp, jaýapty basshylar laýazymynan bosatylǵany málim etildi. Qalaı degende de, óndiristik qaýipsizdiktiń nasharlaýy alańdatady. Anyqtalǵan eskertýlerdi joıý, óndiristik jaraqattanýdy azaıtý, sondaı-aq sanıtarlyq-turmystyq eńbek jaǵdaılaryn jaqsartý boıynsha shuǵyl sharalar qabyldaý qajet.
Qozǵalys jumysyn arttyrý, jolaýshylarǵa qyzmet kórsetý sapasyn jaqsartý, sapasy tómen poıyzdar, tozǵan vagondar sanyn azaıtý jóninde naqtyly tapsyrmalar berildi. Kúzgi-qysqy kezeńde áleýmettik mańyzy bar júkterdi (astyq, kómir) tasymaldaýdy sapaly, ýaqtyly oryndaýǵa basa nazar aýdaryldy.
