Kórmege Buqar jyraý, Qarqabat ana eskertkishteriniń avtory, Sýretshiler odaǵynyń múshesi Beıbit Mustafın bastaǵan qylqalam sheberleriniń týyndylary qoıyldy. Qala turǵyndary qala kelbetinen bólek, tarıhı tulǵalardyń da portretterin tamashalady. Maıly keneppen de, qarapaıym qaryndashpen de salynǵan sýretter bar. Daryndy sýretshiler Jańabek Jumabekov, Marıana Makeeva, Jámıla Ospanova, Shamshyraq Serik kesh qyzyǵyn tamashalaýǵa kelgen kórermenderdiń portretin salyp berdi. Ersin Temirǵalıev saıabaqqa kóshpeli sheberhanasymen kelip, qyshtan qumyra jasady.
Belgili sheber Beıbit Mustafınniń aıtýynsha, mundaı kórmeler jıi ótýi kerek. О́ıtkeni mýzeıge eldiń kóbi bara bermeıdi.
«Mundaı sharalar halyq mádenıetin ósirýge asa qajet. Adam sýretten estetıkalyq lázzat alady. Al ónerdi túsinip, baǵalaıtyndardyń júregi árqashan oıaý», deıdi Beıbit Mustafın.
Kórmeden bólek «Jastar fest» aıasynda sahnada jas aqyndar óleń oqyp, ánshiler án shyrqady.
«Bul sharany tamashalaýǵa kelgenderdiń qarasy qalyń. Osyǵan qarap, qaraǵandy-
lyqtardyń ónerge degen súıispenshiligin baıqaýǵa bolady. Kórermenniń talǵamy bıik. Sýretshiler qylqalammen, aqyndar sózben, ánshiler áýenmen sýret salady. Sol óner ókilderiniń basyn qosý – óte jaqsy ıdeıa», deıdi jas aqyn Maǵjan Asqar.
Ánshiler ásem án shyrqap, kórermenge keremet kóńil kúı syılady. Talǵamy bıik tyńdarmannyń kóńilinen oryn alǵan klassıkalyq áýender de oryndaldy.
Mundaı formattaǵy kesh Qaraǵandyda birinshi ret uıymdastyrylyp otyrǵan joq. Osyǵan deıin de aqyndar men ánshiler ortalyq saıabaqtyń sahnasynda ádebı-sazdy keshter ótkizgen. Munyń bári – Qazaqstan Jazýshylar odaǵy men qala ákimdiginiń birlese júzege asyrǵan jobalary.
Qasymhan ǴALYM,
«Egemen Qazaqstan»
