Qazaqstannyń Ústel tennısi federasııasy uıymdastyrǵan aýqymdy dodaǵa bas seriktes «Samuryq-Qazyna» AQ kompanııalar tobynyń biryńǵaı qaıyrymdylyq operatory – «Samruk-Kazyna Trust» áleýmettik jobalardy damytý qory demeýshilik etti. Maqsat – qaıyrymdylyq jobasy aıasynda ústel tennısimen aınalysýshylar sanyn arttyryp, jasóspirimder sportyn damytý.
Álemdik jarysta baq synaǵan jerlesterimiz óz elimizdegi dodada 2 kúmis jáne 7 qola medal jeńip aldy. Tuǵyrdyń ekinshi satysyna 11 jasqa deıingi sanatta Araılym Qapasbek pen Dýlat Eralhan kóterildi. Alan Qurmanǵalıev (U19), Aınaz Ádilgereeva (U13), Orynbasar Esmahan (U13), Jánııa Bekmuhametova (U11), Ákejan Erlanuly (U11), Karolına Bondar (U11), sondaı-aq 19 jasqa deıingi sanatta aralas jup Alan Qurmanǵalıev/Sarvınoz Mırkadırova qola medaldermen marapattaldy.
Halyqaralyq jasóspirimder saıysynyń jeńimpazdaryn marapattaý rásimine «Samuryq-Qazyna» AQ basqarma tóraǵasy Nurlan Jaqypov qatysty. «Elimizde alǵash ret uıymdastyrylǵan halyqaralyq saıysqa kýá bolyp otyrmyz. Bul – jasóspirimder men jastar sportyn damytýǵa baǵyttalǵan tamasha qadam. Jas sportshylardyń áleýeti men olardyń jeńiske degen qulshynysy bizde chempıondardyń keremet býyny ósip kele jatqanyn kórsetedi», dep atap ótti qor basshysy.
Ústel tennısi federasııasynyń prezıdenti Danııar Ábilǵazınniń aıtýynsha, bul bastama dástúrge aınalyp, eresekter arasyndaǵy týrnır sııaqty jyl saıyn ótkiziledi. «О́z oıyndarymen tek quramanyń kóshbasshylary ǵana emes, sonymen qatar týrnırdiń eń kishkentaı qatysýshylary da qýantyp, tańǵaldyrdy. Bir aıdan soń ótetin kelesi aýqymdy shara «WTT Contender Almaty» týrnırine qatysý úshin álemniń úzdik sportshylary, Olımpııa oıyndarynyń júldegerleri jáne álemdik reıtıng kóshbasshylary keledi», dedi ol.
Sonymen qatar jyl sońyna deıin Astana, Almaty, Qaraǵandy, Pavlodar jáne Aqtóbe qalalarynda áleýmettik álsiz toptaǵy balalar úshin ústel tennısinen sheberlik sharalary qolǵa alynbaq.
