Bas jospardyń negizgi maqsaty – onyń barlyq elementin ózara baılanystyra otyryp, ónerkásiptik-kommýnaldyq jáne rekreasııalyq aımaqtardy utymdy bólip, jaıly jáne qaýipsiz tirshilik ortasyn qurý. Josparda qalanyń perspektıvalyq shekarasyna qosylatyn eldi mekender men turǵyn úı keshenderi de eskeriledi.
Jospardy iske asyrýdyń eseptik kezeńi 2050 jylǵa deıin jalǵasady. Josparǵa sáıkes osy kezeńde qala óńirdiń zamanaýı kópfýnksıonaldy ákimshilik, qarjy jáne mádenı, ónerkásip-ınnovasııalyq, kólik-logıstıkalyq, ǵylymı-bilim berý ortalyǵyna, sondaı-aq Almaty aglomerasııasynyń ınnovasııalyq-ındýstrııalyq, azyq-túlik beldeýi, munaı óńdeý, gaz óńdeý jáne munaı hımııasy ortalyǵyna aınalýǵa tıis. Odan bólek qalanyń Almaty oblysynyń basty týrıstik baǵyttarynyń biri, sýdaǵy demalys orny jáne sý sporty, týrızm, ań aýlaý jáne balyq aýlaý ortalyǵy retinde de áleýeti zor.
Alǵa qoıylǵan mindetterdi iske asyrý úshin josparda ekonomıkalyq qyzmet, turǵyn úı qurylysy, ónerkásipti damytý, qorshaǵan ortany qorǵaý, bilim berý, densaýlyq saqtaý júıeleri, ınjenerlik, kólik ınfraqurylymy jáne kóshe-jol jelisi, kógaldandyrý, jylý, elektr, gaz, sýmen jabdyqtaý, sý tartý jáne ózge de mańyzdy is-sharalar kórsetilgen.
О́ńirdiń kólik-logıstıkalyq júıesin jańǵyrtýǵa jáne odan ári damytýǵa jaqsy serpin beriledi. Qonaev qalasynyń avıasııa, temirjol, jol jáne sý kóligin qoldanýdaǵy kólik-logıstıkalyq júıesiniń mýltımodaldyǵy ony Almaty oblysyndaǵy ortalyq kólik-logıstıkalyq habqa aınaldyrmaq.
Jospardy iske asyrý kezinde jalpy aýdany 2 538,2 myń sharshy metr jańa turǵyn úı salynbaq. О́zin-ózi jumyspen qamtyǵandar deńgeıin 18%-ǵa, jalpy jumyssyzdyq deńgeıin 4,2%-ǵa, jastar arasyndaǵy jumyssyzdyqty 3,8%-ǵa deıin tómendetý josparlanyp otyr.
