Kollajdy jasaǵan Záýresh SMAǴUL, «EQ»
Bıylǵy jańalyq Mańǵystaý oblysyndaǵy 4 mekteptiń 11-synyp oqýshylarynyń túgeldeı memlekettik grantqa qol jetkizýi boldy. Aqtaý qalasyndaǵy fızıkamatematıka pánderin tereńdetip oqytatyn №11 lıseıdiń 11 «A» synybynyń 23 oqýshysy bilim grantyna qol jetkizdi. Synyptaǵy 19 túlek elimizdiń ýnıversıtetterine, qalǵan 4 oqýshy sheteldiń joǵary oqý oryndaryna grantqa oqýǵa tústi. Sondaı-aq Munaıly aýdanyndaǵy №13 mektep-gımnazııasynyń 13 túlegi, Qyzyltóbe lıseıiniń 15 túlegi, Túpqaraǵan aýdanyndaǵy Aqshuqyr mektep-lıseıi 11 «A» synybynyń 14 oqýshysy memlekettik grant ıegeri atandy. Aqshuqyr mektep-lıseıi – óńirdegi aıtýly bilim ordalarynyń biri. Túlegi túgel bilim grantyn ıelengen synyptyń eki oqýshysy «Altyn belgi» ıegeri atansa, bir oqýshysy «Úzdik atestatty» ıelendi. Oqý jylynyń qorytyndysy boıynsha «Jyl oqýshysy», «Jyl ónertapqyshy» jáne «Jyl jas ǵalymy» atalymdarynyń júldegerleri de osy synypta. Synyptyń 91 paıyzy UBT-dan 100-den joǵary upaı jınap, jaqsy kórsetkish kórsetti. Endi synyptyń barlyq oqýshysy 100 paıyz memlekettik grant ıegeri atanyp, senimdi aqtady.
– Ulttyq biryńǵaı testileý – oqýshynyń 11 jyl boıy alǵan biliminiń nátıjesi, qorytyndysy. Sondyqtan da árbir bitirýshi túlek úshin UBT-nyń mańyzy zor. Maǵan da ózge túlekter sekildi qorqynyshty ári qıyn kórindi. Mektep tarıhyndaǵy alǵashqy «Altyn belgige» úmitker bolǵandyqtan jaýapkershilik eseleı tústi. Memlekettik emtıhandy esten shyǵarmaı, kóńil bólip daıyndalý qajet edi. Grantqa tússem degen arman keıde ýaıym syılaǵan kezderi boldy. «Oryndy qareket orynsyz ýaıym-qaıǵyny seıiltedi» dep Abaı atamyz aıtqandaı, men de qur ýaıymdaǵannan góri áreketke kiriseıin dep daıyndyqty bastap kettim. Daıyndyqty erte bastaǵannyń artyqshylyqtary óte kóp. Bilmeı júrgen taqyryptaryńdy úırenesiń, tipti tańdaǵan pánińniń kirispesinen bastap oqýǵa múmkindik bar. Daıyndyq arasynda túrli saıysqa, oblystyq olımpıadaǵa qatysyp úlgerdim. О́ıtkeni bas kótermeı UBT-ǵa daıyndala berseń qorqynyshyń eselene beredi. Sondyqtan kóńil kóterý maqsatynda debat týrnırlerine, sheshendik óner saıystaryna qatystym. Jýyrda biz asyǵa kútken konkýrstyń qorytyndysy jarııalandy. Tizimnen óz esimińdi izdep otyrǵan kezdegi tolqý, qobaljýdy sózben aıtyp jetkize almaımyn. Shúkir, tizimnen óz esimimdi taptym. Men muny tynymsyz eńbektiń nátıjesi dep bilemin. Az-azdan úzdiksiz daıyndalyp, qarys qadammen úlken maqsattarǵa jol ashyldy. Bir kezde synybymyzdyń barlyǵy, ıaǵnı 13 oqýshy da grantqa tústi degen súıinshi habar keldi. Bul, tipti qýanyshymyzdy eselep jiberdi. Ata-analarymyzǵa, súıikti ustazdarymyzǵa alǵys aıtamyn, – deıdi Munaıly aýdany №13 mektep-gımnazııasynyń túlegi Bazarbaı Bekarys.
Bekarystyń qýanyshty sózin anasy Raýshan Avezova «Ulym keshe ǵana mektep tabaldyryǵyn attap edi, mine endi úlken ómirge qadam basqaly otyr» dep jalǵady. «Allaǵa shúkir mekteptegi emtıhandaryn jaqsy tapsyryp, UBT-dan da oıdaǵydaı upaı jınap, joǵary oqý oryndaryna konkýrsqa qatystyq. Kúni-túni tilep, balam óz oıyndaǵy armandaǵan joǵary oqý ornyna tússe eken dep duǵa jasap júrdim. Balamnyń «grantqa tústim» degen qýanyshty habaryn estigende qýanǵannan jylap jiberdim. Bul – qýanyshtyń kóz jasy. Balam ózi armandaǵan joǵary oqý ornyna tústi, bala kúninen jaqsy kóretin matematıka pániniń muǵalimi bolmaq. 11 jyl boıy bilim nárimen sýsyndatyp, tálim-tárbıe bergen ustazdaryna myń alǵys», deıdi ol.
Mańǵystaýda túlekter men ata-analar, ustazdar qýanyp, halyq súısinip jatyr. Bir emes birneshe synyp túlekteriniń tutastaı memlekettik grantqa qol jetkizýi – tosyn jańalyq. Bul – mańǵystaýlyq ustazdar eńbeginiń nátıjesi. Ustazynyń senimin aqtaǵan túlekter úshin, túleginiń tomaǵasyn sypyryp bıikke ushyrǵan ustazdar úshin qýandyq.
Mańǵystaý oblysy
