Polısııanyń habarlaýynsha, bul oqıǵa 8 mamyrda bolǵan. Áleýmettik jelide taraǵan vıdeoda er adam florısti qorlap, dúkennen gúl shoǵyn alyp ketken. Turan aýdandyq polısııa basqarmasynyń 102 arnasyna janjal týraly qońyraý túsken.
Oqıǵa ornyna ýchaskelik ınspektorlar barǵan. Alaıda dúken ıesi mán-jaıdy naqtylaý barysynda eshkimge shaǵymy joq ekenin aıtyp, aryz jazýdan bas tartqan.
Bul jaıtqa qatysty Turan aýdandyq polısııa basqarmasynda QR QK-niń 191-baby 2-bóligi 1-tarmaǵymen «Jábirlenýshiniń ómirine ne densaýlyǵyna qaýipti emes kúsh qoldanyp tonaý» boıynsha sotqa deıingi tergeý bastalǵan.
«Sondaı-aq istiń aq-qarasyn ajyratý kezinde qara fýtbolka kıgen azamat bıylǵy 19 mamyrda otbasylyq sebepterge baılanysty óz ótinishimen ishki ister organdarynan bosatylǵan Qarataý aýdandyq polısııa basqarmasynyń burynǵy qyzmetkeri ekeni anyqtaldy. Áleýmettik jelilerde prokýrordyń uly dostarymen birge Shymkent qalasyndaǵy gúl dúkenine shabýyl jasaǵany týraly aqparat tarady. Bul aqparat shyndyqqa sáıkes kelmeıdi. 2023 jylǵy 9 tamyzda Shymkent qalasynyń prokýratýrasy bul tulǵanyń prokýratýra organdaryna qandaı da bir qatysy joq ekenin, prokýratýra qyzmetkerlerimen týystyq baılanysy joq ekenin resmı túrde habarlady», delingen habarlamada.
