Aýqymdy joba – bul sút taýarlary fermalaryn (MTF) salý úshin 10 jylǵa jyldyq 2,5% jeńildikpen nesıe túrinde beriletin memlekettik qoldaý, 2023 jyly bul soma 100 mlrd teńgeni quraıdy. Jobanyń mindeti – búgingi tańda ımport úlesi joǵary áleýmettik mańyzy bar azyq-túlik ónimderin óndirý arqyly eldiń suranysyn jabý. Joba birneshe jylǵa eseptelgen. Jem-shóp jáne óndiristik bazasy jetilgen, jobalardy qosa qarjylandyrý úshin jetkilikti qarajaty jáne jaqsy praktıkalyq tájirıbesi bar iri sharýashylyqtar ǵana jeńildikpen nesıe alýǵa úmitker bola alady. Sońǵy kórsetkish asa mańyzdy, óıtkeni bıýdjet qarajaty negizinen jumys istep turǵan sút taýarlary fermalaryn keńeıtýge nemese jańǵyrtýǵa kózdelgen. 11 óńirdegi ákimdikter osy talaptarǵa jaýap beretin 67 jobadan turatyn pýldy aldyn ala aıqyndady. Onyń 35-i jumys istep turǵan sút taýarlary fermalaryn keńeıtýge, 32-si jańadan salýǵa arnalǵan.
Aýyl sharýashylyǵy vıse-mınıstri Amangalıı Berdalın keńes kezinde jaqyn arada Aýqymdy joba boıynsha nesıe berý erejeleri qabyldanatynyn atap ótti. Ákimdikter jobalardy qarjylandyrý úshin senimdi agentterdi anyqtaýy qajet. Keńeste úlken jobaǵa qatysýshy barlyq óńir tyńdaldy, AShM men Agrarlyq nesıe korporasııasy júrgizgen árbir bolashaq jobany taldaý nátıjelerin qarady. STF qurylysyna jeńildikpen nesıe berýdi ANK da júrgizedi. Osy jyly korporasııaǵa 16 joba boıynsha ótinim berildi. Onyń beseýi Aýqymdy joba aıasynda ákimdikter tizbesimen qaıtalanady.
Mysaly, Aqmola oblysyndaǵy eki joba Aýqymdy joba boıynsha jáne ANK-dan túrli kezeńderdi iske asyrýǵa jeńildikpen qarjylandyrý surap otyr. Alaıda ár túrli qarjy ınstıtýttary arasynda bir jobanyń bólinýi memlekettik qoldaý sharalaryn bólýdiń ádiletsizdigine ákeledi. Qaıtalanatyn jobalardyń ótinimderi ANK-da qujattardy jınaý satysynda turǵanyn eskere otyryp, olardy tek Aýqymdy joba aıasynda qaraýǵa qaldyrý týraly sheshim qabyldandy. Al ANK-nyń artylǵan somasyn az qarjy bólingen basqa óńirlerdegi jobalarǵa baǵyttaý kerek dep sheshildi.
Serik Jumanǵarın Aýqymdy joba boıynsha bıýdjet qarajatyn jumsaýdyń tıimdiligin baqylaý úshin ákimdikter aldyna mindet qoıdy. Ol úshin bolashaq jobalar pýlyn bekitý aldynda ótinim berýshilerdiń «Atameken» UKP arqyly bıznes-turaqtylyǵy tekseriledi.
О́z tarapynan «Atameken» UKP tóralqa tóraǵasy Raıymbek Batalov jobalardyń iske asyrylýyn baqylaý boıynsha tıimdi ózara is-qımyl jasaý úshin kásipkerler palatasy, memlekettik organdar men ákimdikter arasynda ıntegrasııa qurýdy usyndy.
«Qazir bizde ınvestısııalyq jobalardy monıtorıngten ótkizý júıesi jaqsy qurylǵan. Kez kelgen ýaqytta ınvestısııalyq jobalardy iske asyrý barysyn kórsetetin aqparat júıesi bar, olardyń negizgi kórsetkishteri dashbordqa shyǵarylǵan Júıede kásipkerdiń óz jobasy boıynsha derekter júkteıtin ınvestor kabıneti bar. Ákimdik, AShM jáne basqa da qatysýshylarǵa, memlekettik organdarǵa júıege kirýge ruqsat bere alamyz. Bul obektıvti aqparat arnasy bolmaq», dedi ol.
Vıse-premer bul bastamany qoldap, UKP-ǵa AShM-men birlesip, Aýqymdy joba aıasynda jobalar pýlynyń iske asyrylýyn baqylaý úshin Ulttyq palata bazasynda osy aqparat júıesi negizinde ınvestısııalar jónindegi basqarýshy komıtet qurýdy tapsyrdy. Budan basqa basqarýshy komıtettiń alańynda kelesi jylǵa jeńildikpen nesıe berý úshin pýlǵa kiretin jobalardy irikteý júrgiziletin bolady. Qazir Aýqymdy jobanyń kelesi kezeńin iske asyrý úshin respýblıkalyq bıýdjetten 2024 jylǵa 100 mlrd teńge bólý boıynsha jumys júrgizilýde – ol qus fabrıkalaryn, klımatyn baqylaýǵa bolatyn kókónis qoımalaryn salý jáne keńeıtý, sýarý jónindegi jobalar. Osy jobalardyń barlyǵy negizgi azyq-túlik ónimderi boıynsha eldiń ımportqa táýeldiligin aıtarlyqtaı tómendetýge múmkindik beredi.
«Aýqymdy jobaǵa engen árbir joba boıynsha aqshany paıdalanýdy tolyqqandy baqylaýdy qamtamasyz etý qajet. Aıyna bir ret jınalyp, olardy iske asyrý barysyn qarastyramyz. Maǵan tek 100% nátıje kerek. Sondaı-aq «Atameken» UKP-ǵa otandyq óndirýshilerdi STF qurylysyna barynsha tartýdy usynamyn», dep qorytyndylady Serik Jumanǵarın.
