36 jastaǵy azamat 2026 jyldyń aqpan aıynda Taılandtyń Phýket aralynda demalyp júrgen kezde jaǵdaıy kúrt nasharlap, shuǵyl túrde aýrýhanaǵa jetkizilgen bolatyn. Dárigerler oǵan uıqy beziniń jedel qabynýy men pankreonekrozdyń aýyr túrin, sondaı-aq tynys alý jáne búırek jetkiliksizdigin anyqtaǵan.
Keıin naýqastyń jaǵdaıy odan ári kúrdelenip, sepsıs, ekijaqty pnevmonııa jáne búırektiń jedel zaqymdanýy tirkeldi. Emdeý barysynda Alekseı birneshe operasııany bastan ótkerip, jasandy komada jatqan. Ol uzaq ýaqyt jansaqtaý bóliminde em qabyldady.
Azamattyń taǵdyry qoǵam nazaryn aýdaryp, myńdaǵan adam onyń jaǵdaıyn baqylap otyrdy. Kópshilik em-dom shyǵyndary men medısınalyq evakýasııaǵa qarajat jınaýǵa atsalysty.
Bir aıdan keıin ony elge jetkizý múmkin bolyp, 18 sáýirde Alekseı Qazaqstanǵa arnaıy medısınalyq bortpen tasymaldandy. Alaıda Taıland pen Qazaqstan dárigerleriniń barlyq kúsh-jigerine qaramastan, onyń ómirin saqtap qalý múmkin bolmady.
Marqumnyń týystary men jaqyndary osy ýaqyt boıy qoldaý kórsetken jáne saýyǵyp ketýine tilek bildirgen barsha azamatqa alǵys aıtty.
