Foto: ashyq derekkóz
Kýágerdiń aıtýynsha, birneshe adam jas qyzdy kúshtep kólikke otyrǵyzýǵa áreket jasaǵan.
Threads jelisiniń qoldanýshysy birneshe adamnyń boıjetkendi erkinen tys avtokólikke otyrǵyzýǵa tyrysqanyn kórgen. Jarııalanym avtorynyń málimetinshe, qyzdyń qol-aıaǵy baılanyp, dybysyn shyǵarmas úshin aýzyn japqan.
Kýáger jubaıymen birge saýda ortalyǵynyń kúzet qyzmetinen kómek surap, 102 nómirine habarlasqanyn aıtqan.
Keıinirek qyzdy alyp ketýge árekettengen adamdar onyń qaıyn jurty bolyp shyqqan. Týystarynyń nusqasy boıynsha boıjetkenniń psıhıkalyq densaýlyǵyna qatysty másele bar kórinedi. Olar qyzdy úsh kún boıy izdegenderin jáne ony úıine qaıtarmaq bolǵanyn málimdegen. Alaıda bul aqparat resmı túrde rastalǵan joq. Sondaı-aq qyzdyń qazirgi jaǵdaıy jáne oqıǵaǵa qatysty óz ustanymy týraly málimet jarııalanbaǵan.
Oqıǵa áleýmettik jeli qoldanýshylary arasynda qyzý pikirtalas týǵyzdy. Kópshilik kúsh qoldanǵan adamdardyń áreketin synǵa alyp, quqyq qorǵaý organdaryn tekserý júrgizýge shaqyrdy. Keıbir pikir qaldyrýshylar bul jaǵdaıdan qylmystyq quqyq buzýshylyq belgilerin kórýge bolatynyn aıtqan.
Sonymen qatar keıbir qoldanýshylar týystarynyń áreketi qyzdyń jaǵdaıyna baılanysty bolýy múmkin degen boljam jasady. Degenmen, olar da mundaı másele tek zań aıasynda jáne ýákiletti organdardyń qatysýymen sheshilýi tıis ekenin atap ótti.
Qazir resmı organdar oqıǵaǵa qatysty tolyq aqparat taratqan joq. Qyzdyń jeke basy, oqıǵaǵa qatysýshylar jáne olardyń áreketine beriletin quqyqtyq baǵa týraly naqty málimetter jarııalanbaǵan.
Eske sala keteıik, elimizde nekege májbúrleý men adam urlaýǵa qatysty zań ózgeretini týraly habarlaǵan bolatynbyz.
