Damır Bekbosynovtyń aıtýynsha, Mádenıet jáne sport mınıstrliginiń qoldaýymen Qazaq kuresi Assosıasııasy qazaq kúresin damytýǵa jáne ony mektep baǵdarlamasyna engizý baǵytynda keshendi jumystar júrgizip jatyr. Ony pán retinde oqytý eń alǵash 2021 jyly Astana qalasyndaǵy mektepterde aprobasııadan ótken edi. Oǵan qosa, Nazarbaev Zııatkerlik mektepterimen birge 2020-2021 oqý jylyna arnalǵan qazaq kúresin damytý jónindegi is-sharalardyń birlesken jospary ázirlenip, iske asyrylǵan. Pılottyq jobanyń tıimdiligi aıqyndalyp, jaqsy nátıje kórsetkendikten búginde Astananyń 28 mektebinde qazaq kúresi varıatıvti pán retinde oqytylady.
«Elimizde qazaq kúresimen júıeli túrde aınalysatyndardyń sany 159 myńǵa jetti, 4 427 qazaq kúresi úıirmesi jumys isteıdi. Ulttyq sport túrin damytý baǵytyndaǵy keshendi jumystyń nátıjesinde Mádenıet jáne sport mınıstrligi bul kórsetkishti odan ári arttyrýǵa nıetti», dedi Qazaq Kuresi Assosıasııasynyń atqarýshy dırektory.
Sondaı-aq QR MSM Sport jáne dene shynyqtyrý isteri komıtetiniń tóraǵasy Erbol Myrzabosynovtyń aıtýynsha, qazaq kúresi sporty ásirese aýdandarda, aýyldarda qarqyndy damyp jatyr, óıtkeni bul shyǵyny az, kópshilik úshin qoljetimdi sport túri bolyp sanalady. Biraq qala jastaryn da ulttyq sport túrine baýlý maqsatynda jumystar júrgizilýde. Qazaq kúresi tek sporttyń bir túri ǵana emes, jastardyń jigittik bolmysyn qalyptastyratyn tárbıe quraly ekenin eskersek, ulttyq sport túrin mektep baǵdarlamasyna engizýdiń mańyzy joǵary.
