Vınchenso Gýalterı 1993 jyldyń 4 qańtarynda Germanııanyń soltústik bóliginde ornalasqan Výppertal qalasynda dúnıege keldi. Ol kásipqoı rıngtegi alǵashqy kezdesýin 2015 jyldyń kúzinde ótkizdi. Sol kezden beri 21 ret sharshy alańǵa kóterilgen ol bárinde jeńiske jetti. Jeti básekeni merziminen buryn aıaqtady. Qazirgi kezde nemis boksshysy IBF nusqasy boıynsha chempıondyq belbeýdiń ıegeri. О́ziniń sońǵy kezdesýin Vınchenso bıyl 1 maýsymda Eskıva Falkan Florentınoǵa qarsy ótkizdi. Bul esim jankúıerlerge jaqsy tanys. 33 jastaǵy Brazılııanyń týmasy 2011 jyly Bakýde ótken álem chempıonatynda qola alsa, 2012 jyly Londonda alaýy tutanǵan Olımpııa oıyndarynda kúmis medal ıelendi. Ǵalamdyq dodanyń fınalynda ol, Japonııanyń juldyzy Rete Mýrataǵa ese jibergen edi.
Kásipqoı rıngte de Eskıva ózin jaqsy qyrynan kórsete bildi. Ol toǵyz jyl ýaqyt aralyǵynda qatarynan 30 jekpe-jekte jeńiske jetti. Al Výpertalda ótken kezdesýde Gýalterıden upaı sanymen utyldy. Alaıda brazılııalyq boksshy óziniń jeńilgenin moıyndamady. «Men chempıondyq belbeý úshin nemis jerinde judyryqtasýǵa óz kelisimimdi berdim. Bul – meniń qateligim! Barlyq tóreshiler Germanııadan boldy. Olar jeńisti óz jerlesterine áperýdiń barlyq amalyn istedi. Báseke barysynda qarsylasym eki ret belden tómen urdy. Biraq qazy jumǵan aýzyn ashpady. Kók jelkeden de aýyr soqqylar aldym. Bul jaıt ta eskerýsiz qaldy. Bir sózben aıtsaq, aramza tóreshiler meni altyn belbeýden aıyrdy», dep ashyna sóıledi.
Bir aıta keterligi, Vınchenso Gýalterı barlyq jekpe-jegin óziniń otanynda ótkizdi. Tehnıkalyq turǵydan ol myqty bolǵanymen, «pancher» dep aıta almaımyz. О́ıtkeni 30 jastaǵy nemis boksshysy 21 jeńisiniń tek jeteýinde ǵana qarsylastaryn nokaýtpen utty. Oǵan qaraǵanda Jánibek Álimhanulynyń kórsetkishi áldeqaıda jaqsy. Qazaq jigiti 14 ret rıngke kóterilip, barlyǵynda jeńiske jetti. Toǵyz qarsylasyn kesken terekteı sulatyp saldy. 30 jastaǵy Jetisý oblysynyń týmasy óziniń keıingi básekesin 13 mamyrda Stıven Batlerge qarsy ótkizip, ony ekinshi raýndta uryp jyqty. Rozenbergtegi boks keshinde eki birdeı beldi nusqanyń chempıondyq belbeýi sarapqa salynady.
Jánibek aldaǵy jekpe-jekte jeńiske jetedi dep úmittenemiz. Qandasymyz óziniń ınstagram paraqshasynda «Tarıhtyń ekinshi betin jazýdy bastadyq! Chempıon bolý bir basqa, tarıhı jekpe-jekter ótkizip, iz qaldyrý bir basqa!» degen jazba qaldyrdy.
