Kortta – kil myqtylar

Qazirdiń ózinde shveısarııa­lyq Sten Vavrınka, aýstrııalyq Do­mınık Tım, amerıkalyq Se­bastıan Korda jáne taǵy basqa ta­nymal tennısshiler Astanaǵa keletinderin rastady. Al sol oıyn­shylarǵa qysqasha toqtalsaq,  33 jastaǵy Sten Vavrınka «Úlken dýlyǵa» sanatyndaǵy týrnırlerdi úsh ret utqan. Atap aıtsaq, 2014 jy­ly Aýstralııanyń ashyq birin­shiligi, 2015 jyly Rolan Garros jáne 2016 jyly US Open doda­synda bas júldeni oljalady. Sol jarystardyń fınalynda ol ıspanııalyq Rafael Nadal men serbııalyq Novak Djokovıch (eki ret) syndy attary ańyzǵa aınalǵan tennısshilerdi tize búktirdi. Sten ATR jarystaryn 16 márte utty. Odan bólek, 2008 jyly juptyq saıysta Beıjiń Olımpıadasynyń jeńimpazy atandy. Dáýiri júrip turǵan kezinde Shveısarııanyń sańlaǵy álemdik reıtıngte úshinshi orynǵa deıin kóterildi. Búgingi tańda Vavrınka ATR reıtınginde 21-oryndy ıelenip otyr.

29 jastaǵy Domınık Tım 2020 jyly US Open týrnırinde top jardy. Aqtyq synda ol ger­manııalyq Aleksandr Zverevti súrindirdi. Sol kezde Aýstrııanyń saıypqyrany álemdik reıtıngte úshinshi satyǵa jaıǵasty. Eki ret Rolan Garros jáne bir ret Aýstralııanyń ashyq birin­shiliginiń fınalynda oınady. Parıjdegi jarystyń sheshýshi tusynda ol eki retinde de Rafael Nadalge jol berse, Melbýrnde Novak Djokovıchten jeńildi. 2019 jáne 2020 jyldary ATR-diń qorytyndy týrnırleriniń fınalynda óner kórsetip, dúbirli dodalardyń 17-sinde dara shyqty. Jaraqatyna baılanysty biraz ýaqyt kortqa shyqpaǵandyqtan, búginde Tım reıtıngte 83-orynda tur.

23 jastaǵy Sebastıan Korda – qazir naǵyz babynda. ATR tiziminde 30-orynǵa turaqtaǵan AQSh-tyń ókili bıyl Aýstralııanyń ashyq birinshiliginiń shırek fınalyna deıin jetti. 2020 jyly Rolan Garros jáne 2021 jyly Ýımbldonnyń tórtinshi kezeńinde súrindi. Kezinde Korda jastar arasynda Melbýrndegi  «Úlken dýlyǵa» týrnırin utyp, álemdik reıtıngte kósh bastady.

Joǵaryda esimderi atal­ǵan sań­laqtardan bólek, Qazaqstan­nyń da eń tańdaýly tennısshileri Astanadaǵy týrnırde baq synaıdy. Solardyń arasynan Alek­sandr Býblıkti jeke-dara atap ótýge bolady. 26 jastaǵy jer­lesimiz bıyl Ýımbldonnyń tór­tinshi kezeńinde oınady. 2020 jy­ly jasyl qurlyqtaǵy «Úlken dýlyǵa» sanatyndaǵy týrnırdiń jartylaı fınalynda jáne 2021 jyly Parıjdegi dodanyń fınalynda óner kórsetti. Sońǵy eki jylda Monpele men Galledegi ATR jarystarynyń aqtyq synynda germanııalyq Aleksandr Zverev pen reseılik Andreı Rýblevten aılasyn asyryp, bas júldeni qanjyǵasyna baılady. Bul kúnderi Býblık álemdik reıtıngte 27-oryndy enshilep otyr.