Foto: Úkimettiń baspasóz qyzmeti
Úkimet basshysy Qazaqstan taıaý jyldary energetıkalyq júıeni biriktirýdi aıaqtap, ekonomıka men halyqtyń elektr energııaǵa qajettiligin tolyq qamtýdy josparlap otyrǵanyn atap ótti. Atap aıtqanda, respýblıkanyń Elektr energetıka salasyn damytý jónindegi tıisti tujyrymdama qabyldandy.
Qazirgi ýaqytta qoldanystaǵy elektr stansııalaryn jańǵyrtý boıynsha jobalar júzege asyrylýda, bul 2027 jylǵa qaraı 1700 MVt-tan astam qýatty iske qosýǵa múmkindik beredi. Bıyl Ekibastuz GRES-1-de №1 energoblokty qalpyna keltirý aıaqtalady, bul aldaǵy kúzgi-qysqy maýsymda qosymsha 500 MVt-pen qamtamasyz etpek.
Sonymen qatar Kókshetaý jáne Semeı qalalarynda jańa jylý elektr ortalyqtaryn salý josparlanǵan. Ulttyq elektr jelisin jańǵyrtý jumystary júrgizilýde. Budan bólek, Batys energetıkalyq aımaǵynyń elektr jelilerin kúsheıtý jobasyn aıaqtaý josparlanǵan jáne Ońtústik aımaqtyń elektr jelilerin kúsheıtý boıynsha joba ázirlenip jatyr.
«CMC korporasııasynyń Qazaqstanǵa ınvestısııalaý boıynsha tájirıbesi bar. Biz kompanııanyń energetıkalyq jobalarǵa qatysý arqyly ınvestısııa aýqymyn keńeıtý jónindegi nıetin quptaımyz», dedi Álıhan Smaıylov.
О́z kezeginde Chjao Chjensıan China National Machinery Import & Export Corporation ózara tıimdi sharttarda birlesken jobalardy ázirleýge jáne jalpy ornatylǵan yntymaqtastyqty ári qaraı nyǵaıtýǵa daıyn ekenin aıtty.
«Biz seriktesterimizben egjeı-tegjeıli talqylaý ótkizip, qarjylyq ınstıtýttarymyzdyń qoldaýyn aldyq. Bul bizdiń úlken qyzyǵýshylyǵymyzdy kórsetedi. Atalǵan jobalardy júzege asyrǵan jaǵdaıda Qazaqstan ekonomıkasynyń damýyna úles qosý úshin jergilikti merdigerlermen jáne taýar jetkizýshilermen kelisimshart jasaımyz», dedi CMC vıse-prezıdenti.
China National Machinery Import & Export Corporation qyzmeti energetıka, kólik, jyljymaıtyn múlik, hımııa jáne jeńil ónerkásip, ınfraqurylym, keme qatynasy jáne taǵy basqa salalardy qamtıdy. Kásiporynnyń ónimderi men qyzmetteri álemniń 160-tan astam elinde usynylǵan.
