Máselen, 23 tamyzda Qyzylorda oblysynyń Shıeli aýdanyna qarasty Almaly aýylynyń tusynda GAZel jáne «Nexia» avtokólikteri soqtyǵysyp, saldarynan 5 adam qaıtys bolyp, 3 adam jaraqat aldy. Dál osy kúni «Samara-Shymkent» avtojolynda Alǵa aýdanynyń Sarytoǵaı aýylyna jaqyn jerde «Volvo» júk kóligi men VAZ-2110 avtokóligi soqtyǵysqan. Apat saldarynan 44 jastaǵy jeńil avtokóliktiń júrgizýshisi oqıǵa ornynda alǵan jaraqattarynan qaıtys boldy.
Al 20 tamyz kúni «Almaty-Ekaterınbýrg» tasjolynda 47 jastaǵy «Lexus LX470 «júrgizýshisi tizginge ıe bola almaı aýdarylǵan. Jol-kólik apaty saldarynan 46 jastaǵy jolaýshy oqıǵa ornynda ajal qushsa, júrgizýshiniń ózi jáne 35 jastaǵy jolaýshy jedel járdem kóliginde qaza tapty. Taǵy eki jolaýshy aýrýhanaǵa jetkizilgen.
Munyń barlyǵy elimizdiń kúrejoldarynda kún saıyn tirkelip jatqan qaıǵyly kólik apattarynyń keıbir mysaly ǵana. Polısııa qyzmetkerleri jyldamdyqty asyrmaýdy qansha eskertip kele jatsa da, el ishindegi apattyń sany azaıar emes. Endi ne istemek kerek? Ishki ister mınıstrligi budan bylaı mundaı keleńsizdikterdiń aldyn alý úshin qala ishin tártipke keltirgen kameralar kómegine júginýdi jón dep taýyp otyr.
Atap aıtqanda, jol júrý qaýipsizdigin qamtamasyz etý jáne jol-kólik oqıǵalarynyń aldyn alý boıynsha baqylaýdy kúsheıtý maqsatynda IIM Avtomobıl joldary komıteti men «QazAvtoJol» UK AQ birlesip, belgilengen jyldamdyq rejimin asyrǵan avtokólikterdi tirkeý úshin qala syrtyndaǵy joldarda kameralar júıesin iske qosty. 33 «Zerek-2» baǵdarlamalyq-apparattyq kesheni ákimshilik óndiristerdiń biryńǵaı tizilimi júıesimen ıntegrasııalanǵan, ıaǵnı nusqamalardy quqyq buzýshylarǵa jiberý avtomatty rejimde júzege asyrylmaq.
– Búgingi tańda «Zerek-2» kesheni «Shymkent-Qyzylorda», «Shymkent-О́zbekstan» shekarasy, «Shymkent-Taraz», «Taraz-Qaınar», «Qonaev-Taldyqorǵan» jáne «Astana-Pavlodar» avtojoldarynda jumys atqarýǵa daıyn. Osyndaı baǵdarlamalyq keshen «Kókshetaý-Astana» tasjolynda buryn iske qosylǵan bolatyn jáne joldaǵy quqyq buzýshylyqtardy tirkeýde jaqsy nátıjeler kórsetip jatyr, – deıdi IIM ákimshilik polısııa komıtetiniń erekshe tapsyrmalar jónindegi aǵa ınspektory Aqtoty Boranova.
Aıta ketsek, osy jyldyń jeti aıynda elimizdiń joldarynda jeti myńǵa jýyq jol-kólik oqıǵasy tirkelip, 1 200-den astam adam qaza tapsa, 8 500-ge jýyq adam túrli dárejedegi jaraqat alǵan. Onyń ishinde jyldamdyq rejimin saqtamaý saldarynan qala syrtyndaǵy trassalarda 730 jol-kólik oqıǵasy tirkelgen. «Joǵaryda atalǵan joldarda 25 tamyz kúngi saǵat 00:00-den bastap «Zerek-2» kesheni shtattyq rejimde jumysyn bastaıdy. Sondyqtan júrgizýshilerden jyldamdyq rejimin jáne avtokólikter arasyndaǵy qashyqtyqty saqtaýdy suraımyz», dedi Aqtoty Boranova.
