«Arselorǵa» Úkimettiń ámiri júrmeı me?

2022 jyly 17 tamyzda «Maıqudyq QQ «SÚ» JShS men «ArselorMıttal Temirtaý» AQ arasynda №4600025567 kelisimshart jasalǵan. Sol ýaqyttan beri «KAZ Ferrıt» JShS óndirilgen kómir konsentratyn «Arselorǵa» osy kelisimshart sheńberinde jóneltip otyrdy. Biraq «Arselor» tarapynan konsentrattyń sapasy, jetkizý merzimi nemese sharttyń basqa talaptary boıynsha birde-bir eskertý bolmaǵan. Kelisimsharttyń merzimi – bıyl 31 jeltoqsanǵa deıin. Buǵan qaramastan alpaýyt kompanııa konsentrat alýdy maý­sym aıynan bastap esh sebepsiz, túsindirýsiz toqtatqan.

– Bıyl shilde aıynan bas­tap kásiporyn qyzmetin toq­tatý­ǵa májbúr boldy. Barlyq ujym aqy­syz eńbek demalysyna jibe­ril­di. Zaýyttyń jabylýy 200-den asa jumysker men olardyń ot­ba­sylarynyń materıaldyq ál-aýqatyna keri áserin tıgizedi, kóp­tegen jumysshynyń nesıeleri bar. Bul jaǵdaı fabrıka jumysyn toqtatýǵa, salyq aýdarymdaryn keshiktirýge, jumyssyzdyqqa alyp keldi, – deıdi «Kaz Ferrıt» JShS dırektory Bekjan О́mirbekuly.

Al «Aqtas Kómir» JShS dırektory Nurym Bolatuly «Alpaýyt kompanııaǵa qylar qaıranymyz joq», deıdi. Úkimet basyndaǵylar ún qatsa degen úmiti bar.

– 2021 jyly qyrkúıek aıynda lısenzııa alǵanbyz. Sodan beri atalǵan kompanııalarmen jumys istep keldik. Bıyl maýsymda «ArselorMıttal Temirtaý» AQ-dan shotymyzǵa aqsha túsý toqtady. Sodan biz de shilde aıynan bastap jumysty toqtatýǵa májbúr boldyq. Jumyskerlerge 10 mln teńgege jýyq jalaqy qaryzbyz. 800 mln teńge merdigerlerge bereshekpiz. Tasymaldaýshy kompanııalarǵa 60-70 mln qaryzbyz. Jumyskerlerimiz 10 maýsymnan bastap eńbekaqy alǵan joq. Kásiporyn bolǵan soń, jumysty kidirtýge taǵy bolmaıdy. Jumyskerlerdi jumysqa shaqyryp alamyz. Tóleýge ýáde berip, alaıda aqsha joq. Biz kómir shyǵaramyz. Al «KAZ Ferrıt» koks óndiredi. Bizdiń ózimizge qazir 1 mlrd teńge qaryz, – deıdi «Aqtas Kómir» JShS dırektory Nurym Babas.

«ArselorMıttal Temirtaý» AQ qazir shetelden kómir konsentratyn satyp alyp otyr. Al sapasy joǵary, qajetti kólemde ónim shyǵaratyn otandyq zaýytty elep te otyrǵan joq. Buǵan qosa 33 myń tonna konsentratty satyp alǵany úshin 2 mlrd 610 mln teńgeniń ózin ótemegen.

– «AMT» AQ taýar jetkizilgen kún­nen bastap 25 kúntizbelik kún ishinde tólem júrgizýge min­det­ti. Alaıda jóneltken ónimi­mizdiń aq­sha­syn ala almaı otyrmyz. Ese­sine mer­digerlerge, jumys­ker­lerge, memleketke qaryzbyz. Kóbi ýa­qyt­sha aqysyz demalysqa ket­se, endi bireýleri jumystan shy­ǵyp jatyr. Biz óz tarapymyzdan «Ar­se­­lorǵa» juma saıyn hat jazamyz. Alaıda áli kúnge deıin mardym­dy jaýap kelmedi. Sebebi de túsiniksiz. Ju­mysymyzda kidiris bolǵan emes. 60 myń tonnaǵa jýyq kómir jet­kizildi. Qalǵan 33 myń tonna kómir­diń qarajaty alashaq kúıinde tur, – deı­di «Maıqudyq» QQ «SÚ» JShS buryn­ǵy dırektory Svetlana Bojıeva.

Aıta keteıik, «Maıqudyq QQ «SÚ» – byltyr óńir boıynsha «Senimdi salyq tóleýshi» jáne «Se­nim­di óndirýshi» atalymdary bo­ıynsha úzdik dep tanylǵan kompanııa.

Qysqasy, kásiporyn ujymy memlekettiń bul jaǵdaıǵa shuǵyl aralas­qanyn ótinedi. Úkimet otan­dyq óndiris oryndaryn qoldaıdy degen úmit bar. Álde «Arselorǵa» Úkimettiń ámiri júrmeı me?

Biz óz kezegimizde osy jaǵdaıǵa baılanysty «ArselorMıttal Temirtaý» kompanııasynyń baspa­sóz qyzmetine suraý salǵanbyz, ádet­tegideı jaýap keshigip jatyr...

Qaraǵandy oblysy