Respýblıkalyq mańyzy bar joldardy turaqty patrýldeýge jáne profılaktıkalyq aqparattyq-túsindirý jumystaryna qaramastan jyl saıyn jol ınfraqurylymy elementterin urlaý faktileri tirkelip otyr. Alaıda ótken jyldarmen salystyrǵanda jol ınfraqurylymy elementterin urlaý faktileri birshama azaıǵan. Máselen, 2023 jyldyń basynan beri respýblıkalyq mańyzdaǵy kúrejoldardan shamamen 20 mln teńge somaǵa jol ınfraqurylymy elementteri urlanypty. Salystyrmaly túrde qarasaq, osydan eki jyl buryn bul shyǵyn 60 mln teńgeden asqan eken.
Jol boıynan kóbinese jol belgileri, úı janýarlarynyń jolǵa shyǵyp ketýinen qorǵaıtyn torly qorshaýlar, katafottar men stroboskoptar urlanady. Tipti belgisiz adamdar jaryq baǵyttaıtyn eki úlken transformatordy urlaǵan jaǵdaı da tirkelipti.
Urlanǵan jol ınfraqurylymy elementteri kóbinese turmystyq maqsattarda qoldanylady eken. Mysaly, tórtburyshty jol belgilerinen kúrekter, dóńgelek pishindi jol belgilerinen tabalar men qazandarǵa arnalǵan qaqpaqtar, úı janýarlarynyń jolǵa shyǵyp ketýinen qorǵaıtyn torlardan úı qorshaýlary jasalsa, jaryqdıodty katafottar velosıpedterge bekitiledi eken.
Osyǵan oraı jolǵa jaýapty mekemeler respýblıkalyq mańyzy bar avtomobıl joldaryn paıdalanýshylardan memlekettik múlikti uqypty ustaýǵa shaqyryp otyr. Jol boıynda ornalasqan barlyq jol ınfraqurylymy elementi qozǵalys qaýipsizdigin qamtamasyz etýge baǵyttalǵan. Bul máselede azamattardyń jeke jaýapkershiligi óte mańyzdy bolyp tur.
El jolshylary bıyl da bul baǵytta qyrýar jumys atqarypty. Atap aıtqanda, 8 myńǵa jýyq jańa jol belgisin, 19 myń dana katafotty, 3,5 myń sharshy metr shý jolaǵyn jáne 10 myń sıgnal baǵanasyn ornatqan. Sonymen qatar mamandar 9,7 myń qýma metr tosqaýyl qorshaýyn jabdyqtap, 23 myń shaqyrymnan asa joltańba syzyǵyn jańartypty. 179 avtopavılon jáne demalys alańyn jóndedi. Jol qozǵalysy erejelerin saqtap, jol qaýipsizdigin nasıhattaý maqsatymen respýblıkalyq avtotrassalardyń boıynda 300-den asa jańa aqparattyq panno ornatylǵan.
