Byltyr atalǵan kolledjge pedagog-ǵalym Bolat Ábdikárimulynyń esimi berilgen bolatyn. Bul jolǵy sharapatty sharýa, kórsetilip jatqan qurmet – sol istiń jalǵasy. Nura óńirinen ósip-ónip, elimizdegi bilim men ǵylymnyń damýyna eleýli úles qosqan ǵalymdy jerlesteri aıryqsha qurmetteıdi. Saltanatty is-sharaǵa B.Ábdikárimulynyń týǵan-týystary da qatysty.
Qaraǵandy oblysy ákiminiń orynbasary Baýyrjan Asanov ardaqty azamatqa kórsetilip jatqan qurmetke rızashylyǵyn aıtyp, oblys ákimi Ermaǵanbet Bólekpaevtyń quttyqtaýyn jetkizdi. Músindi qazaqtyń tuńǵysh ǵaryshkeri Toqtar Áýbákirov, memleket jáne qoǵam qaıratkeri, ekonomıka ǵylymynyń doktory Eleýsin Saǵyndyqov, Nura aýdanynyń ákimi Baqytjan Muqanov, Aqtoǵaı aýdanynyń qurmetti azamaty Saǵadat Dúısebekov jáne ǵalymnyń perzenti Aıan Bolatuly saltanatty túrde ashty.
– Ardaqty azamattyń ıgi isteri men eren eńbegin jastarǵa úlgi etý maqsatynda kolledjge Bolat Ábdikárimuly esiminiń berilýi – mańyzdy oqıǵa. Buǵan qosa bilim ordasynyń aldyna bıýstin qoıý – úlken qurmet. Sebebi Nura óńirinde týyp-ósken, bilim alǵan, bar ǵumyryn elimizdiń bilim men ǵylym salasyna arnaǵan Bolat Ábdikárimulynyń esimimen el maqtanady, – dedi T.Áýbákirov.
Al ǵalymnyń zamandas dosy Eleýsin Saǵyndyqov ǵalymmenen alǵash tanystyǵynan bastap, onyń qaıratkerligine toqtaldy.
– «Jaqsynyń aty, ǵalymnyń haty ólmeıdi» degenge taǵy da kózimiz jetip otyr. Bolat Ábdikárimuly sııaqty ǵasyr aralatyp týatyn tulǵany búgingi jáne odan keıingi urpaqtyń sanasyna sińirý – paryz. Onyń eń eleýli isteriniń biri – kásiptik-tehnıkalyq mektepterdi saqtap qalýǵa jan salyp baqty. Solaı etip qana qoımaı, kásiptik-tehnıkalyq lıseıler, gımnazııalar, avtorlyq mektepter, qazaq-túrik lıseılerin ashýǵa qol jetkizdi. Bolat Ábdikárimuly – bul salada qarapaıym ǵana qyzmet etip qoımaı, kásiptik bilim berýdi ǵylymı turǵyda zerttep, zerdelep, belgili bir tujyrym jasaǵan ǵalym. Bókeńniń eńbektegi jetistikteriniń qupııasy – ǵylymı-teorııalyq negizdemede. «Adamnyń dańqyn eńbek shyǵarady» degendeı, Bókeń eńbegimen dańqqa bólendi, sonymen birge ol eńbekti kóteretin de adam ekenin óziniń is-tájirıbesimen dáleldedi, – dedi E.Saǵyndyqov.
Sonymen qatar Parlament Májilisiniń depýtaty Qudaıbergen Beksultanov, Qazaqstan Respýblıkasynyń eńbek sińirgen ártisi Serik Ospanov ta aqjarma lebizderin jetkizdi.
Aıan Bolatuly meımandarǵa alǵysyn bildirip: «Jaqsy áke balaǵa qyryq jyl azyq emes pe? Ákemniń kózin kórgen, syılasqan, is-sharaǵa arnaıy kelip, ákemiz týraly jyly estelikterimen bólisken sizderge úlken rahmet. Osy sharýamyzdy birden qoldaǵan aýdan basshylyǵyna da aıryqsha alǵys aıtqymyz keledi», dedi.
Saltanatty is-shara sońynda qonaqtar ustaz-ǵalymnyń eskertkishine gúl shoqtaryn qoıdy. Odan soń kolledjdiń tynys-tirshiligimen tanysty.
Aıta ketkenimiz jón bolar, Úkimettiń 2021 jylǵy 15 jeltoqsandaǵy № 890 qaýlysyna sáıkes, «Nura kópsalaly kolledji» «Bolat Ábdikárimuly atyndaǵy Nura kópsalaly kolledji» dep ataldy.
Qaraǵandy oblysy,
Nura aýdany
