Músháıraǵa respýblıka boıynsha 18 ben 45 jas aralyǵyndaǵy qyryqtan asa aqyn óleń joldaǵan. Qazylardyń uıǵarymymen osylardyń ishinen 9 aqyn iriktelip, júldege laıyq dep tanyldy. Alqa quramynda aqyn, Memlekettik Abaı atyndaǵy syılyqtyń laýreaty Ǵalym Jaılybaı, aqyn Baýyrjan Babajanuly, jazýshy, etnograf Tórehan Maıbas, aqyn, Qazaqstan Jazýshylar odaǵy oblystyq fılıalynyń tóraǵasy Janat Jańqash boldy. Aqyn, Memlekettik Abaı atyndaǵy syılyqtyń laýreaty Serik Aqsuńqaruly tóraǵalyq etti.
Músháıranyń sharty boıynsha aqyndar Qaraǵandyǵa, kenshilerge óleń arnady. Aqyn, Qazaqstan Jazýshylar odaǵy oblystyq fılıalynyń tóraǵasy Janat Jańqashuly bul jolǵy músháıraǵa túsken óleńderdiń deńgeıi joǵary ekenin atap ótti.
– Bul joly eki aqynǵa birinshi oryndy berýdi uıǵardyq. О́ıtkeni kelip túsken óleńderdiń deńgeıi joǵary. Jaqsy óleńge jaqsy júlde bergendi jón sanadyq. О́z baǵasyn alýǵa tıis. Júldegerlerdi anyqtaý ońaı bolmady. Músháırany ótkizýdegi maqsat – kendi ólke Qaraǵandynyń topyraǵynda ótken tarıhı oqıǵalar men tulǵalar taǵylymyn dáripteý, óleń ózegine aınaldyrý hám kenshiler ómirin jyrǵa qosyp, eńbek jolyn nasıhattaý, – deıdi J.Jańqashuly.
Bul músháırada eki aqynǵa birinshi oryn berildi. Atyraý qalasynan kelgen Álııa Dáýletbaeva men temirtaýlyq Ádilet Shópenge buıyrdy. Qos qalamgerge 700 myń teńgeniń sertıfıkaty tabystaldy. Ekinshi oryn aqyn, «Egemen Qazaqstan» gazetiniń tilshisi Jánibek Álımanǵa buıyrdy. Úshinshi oryndy Astanadan kelgen Ularbek Dáleıuly men almatylyq Asylan Tilegen bólisti. Yntalandyrý syılyǵyna Saltanat Qaıyrbek, Erik Naryn, Dáýlet Jadyrasyn, Tańsáýle Ágenqyzy ıe boldy.
Áýelde aqyndar úshin 6 júlde ǵana taǵaıyndalypty. Qazylardyń sheshimimen taǵy qosymsha 3 júlde qosylǵan. Ákimdikten bólingen qarajattan bólek demeýshilerden de qoldaý bolǵan. Uıymdastyrýshylar Nurgeldi Omarhanovqa, Bekzat Qomarulyna jáne «Exim Artis» kompanııasyna alǵys bildirdi.
Kesh barysynda Arqanyń tanymal ánshileri Medet Osataev, Araılym Júkenova, Saıan Bódes, Nııaz Qanafııa, Nurbek Shaban ánnen shashý shashty.
Qaraǵandy oblysy
