Instagram, Facebook áleýmettik jelilerinde Qaraǵandy oblysy Shahtınsk qalasynyń ata-analary qalalyq bilim basqarmasy mınıstrliktiń buıryǵyn buzyp otyrǵanyna shaǵymdandy. Instagram jelisindegi «Vechernıaıa Karaganda» paraqshasynda jarııalanǵan vıdeoda Shahtınsk qalasynyń birneshe mektebine (№1, 5, 6, 7 mektepter) balalary baratyn ata-analar qarsylyǵyn bildirgen.
«Elimizdegi oqýshylardyń bári aptasyna 5 kún oqyǵanda, biz nege 6 kún oqımyz? Shahtınsk qalasynyń bilim bólimi Oqý-aǵartý mınıstrliginiń №153 buıryǵyn buzyp otyr. Bólim basshysy Nıkolaı Onsovıch ózine qalaı yńǵaıly bolsa, solaı jasap jatyr. Keshe biz ony kezdesýge shaqyrdyq, biraq kelmedi. Jaqynda qalalyq bilim bóliminiń chatynda onyń haty jarııalandy. Onda Nıkolaı Onsovıch óziniń osy sheshimi arqyly balalarymyzdyń densaýlyǵy men bos ýaqytyna qamqorlyq tanytyp otyrǵanyn aıtqan. Shyn máninde bilim bóliminiń basshysy kerisinshe sabaq ýaqytyn 40 mınýttan 45 mınýtqa kóbeıtip jiberdi. Sonyń kesirinen ekinshi aýysym ýaqyty shegerilip, tústen keıin oqıtyn oqýshylar mektepten kesh qaıtatyn boldy. Bos ýaqyty deıdi, qaıta balalardy otbasynda ótkizetin artyq bir kúndik demalysynan aıyryp, senbi kúnine de sabaq qoıdy. Endi balalarymyz jeksenbi kúni ǵana demalady», dedi shaǵymdanǵan ata-analardyń biri.
Jańa oqý jyly bastalarda Oqý-aǵartý mınıstrligi Orta bilim komıtetiniń tóraǵasy Qanybek Jumashev oqý jylynyń uzaqtyǵy burynǵy qalpyna kelýine baılanysty túbegeıli ózgerister bolmaıtynyn aıtqan-dy.
«Jumys aptasynyń uzaqtyǵy bes kún bolyp qalady. Mektepter mınıstrdiń 2020 jylǵy 21 sáýirdegi №153 buıryǵyn basshylyqqa alýǵa tıis. Barlyq bilim berý uıymy burynǵydaı shtattyq tártipte jumys isteıdi. Bilim berý uıymdarynyń ákimshiligi sabaq kestesin, kúntizbelik josparlaryn jáne saǵattardy bólýde ádettegideı ózderi jaýapty. Qazirgi ýaqytta oqý jylynyń uzaqtyǵy týraly buıryq kelisýge joldandy. Alda bekitiledi. Osy buıryqta 34 aptalyq oqý jyly 1 qyrkúıekten bastalyp, 25 mamyrda aıaqtalatyny naqty kórsetilgen», degen edi Q.Jumashev.
Jumys aptasynyń uzaqtyǵy bes kún bolyp qalady dep anyq aıtyldy. Soǵan qaramastan mektepter 6 kúndik oqý aptasyna kóship jatyr. Sonda mınıstrliktiń sózine óńirler, mektepter mán bermeı otyr ma? Mınıstrlikke sebebin surap baılanysqa shyǵyp edik, bilim basqarmalaryna siltedi. Ári 1 qyrkúıektegi materıalymyzda berilgen Q.Jumashevtyń sózin qaıta jiberip, vedomstvonyń resmı jaýaby osy ekenin jetkizdi.
Al Qaraǵandy oblystyq bilim basqarmasynyń basshysy Gúlsim Qojahmetova óziniń Facebook áleýmettik jelisindegi resmı paraqshasynda ata-analardyń shaǵymyna «Ata-analardan kelip túsken ótinishterdi nazarǵa ala otyryp, qalalar men aýdandardyń bilim bólimderiniń basshylaryna bes kúndik rejimge kóshý úshin keste qurý múmkindigin qarastyrý usynyldy. Sonymen qatar oqý josparynda kózdelgen gımnazııa jáne lıseı synyptary úshin qosymsha saǵattardy senbi kúnderi ótkizýdi usynamyz», dep jaýap bergen.
Shahtınsk qalalyq bilim bóliminiń basshysyna habarlasyp edik, ókinishke qaraı, telefonyn kótermedi. Osyndaıda «Eriksiz ózgertile beretin buıryq nege shyǵarylady? Buıryǵy júrmeıtini bar, mınıstrlik nesine qurylady?» deısiń...
