Kúıshi Aıtbaı aǵamyz halyq batyryna arnap jazǵan týyndysyn ótken ǵasyrdaǵy 60-jyldardyń basynda shyǵarsa kerek. Sol kezde Amangeldi Imanovtyń 90 jyldyǵy atalyp ótipti.
Mine, sodan beri de alpys jyl ýaqyt ótti. Tyńdarmanǵa jol tartqan beınebaıanda «Amangeldi dúbirin» daryndy kúıshi, Qazaqstannyń eńbek sińirgen qaıratkeri Anar Muzdahanova Astana qalasy ákimdigi E.Rahmadıev atyndaǵy Memlekettik akademııalyq fılarmonııasynyń Qazaq orkestrimen birge oryndaıdy. Orkestr dırıjeri, Mádenıet qaıratkeri Nurlan Bekenov.
– Aıtbaı aǵanyń kózi tirisinde osy shyǵarmaǵa beınebaıan túsirýdi kópten beri oılap júrdim. Sonyń sáti batyr babamyzdyń 150 jyldyq mereıtoıy qarsańynda iske asqanyna qýanyshtymyn. Beınebaıan Qorǵaljyn aýdanynda túsirildi. Sondaı-aq biz «Bas sardar» atty derekti fılm jasadyq. Sondaǵy keıbir sıýjetterdi osyǵan paıdalandyq. Beınebaıannyń bir ereksheligi, munda kúı jelisimen oqıǵa órbip, akterler oıyny kórsetiledi. Beınebaıanda batyrdyń anasy Qalampyr Qaqýqyzy, Ábdiǵapar Janbosynuly, Mirjaqyp Dýlatulynyń beıneleri bar, – dedi osy ıgi is-sharany júzege asyrýǵa qoldaý kórsetken «Amangeldi Iman» qorynyń basshysy, batyrdyń urpaǵy Tolqyn Sultan.
