Atalǵan syılyq 2012 jyldan berilip keledi. Osy ýaqyt aralyǵynda 400-den astam adam qatysyp, tilge janashyrlyq tanytqan ozattar marapattaldy. Bıyl «Til janashyry» syılyǵynyń laýreattaryn irikteý jónindegi komıssııa 8 atalym boıynsha qatysýǵa nıet bildirgen 35 adamnyń jumysyn qaraǵan. Saltanatty sharada Qaraǵandy oblysy ákiminiń orynbasary Baýyrjan Asanov quttyqtaý sóz sóıledi.
«Bul mereke – elimiz úshin mańyzdy. Memleket basshysy Qasym-Jomart Toqaev: «Halqymyzdyń tarıhy da, taǵdyry da – tilinde. Til ótken tarıhpen ǵana emes, búgin men bolashaqty baılanystyratyn mańyzdy qural», dep atap aıtty. Elimizde barlyq etnos ókilderiniń ana tilin damytýǵa barynsha jaǵdaı jasalyp keledi. Onyń ishinde memlekettik tildi qoldaný aıasyn keńeıtý sharalary júıeli ótip keledi. Memlekettik tilge degen suranys joǵary. Zaman talabyna saı til oqytý jumystary, jańa tehnologııa, úzdik ádistemelermen jetildirildi. Aımaqta qazaq tilinde tálim-tárbıe, bilim beretin balabaqshalar men mektepterdiń sany jyl saıyn artyp keledi. Til saıasatyn iske asyrý baǵytynda atqarylyp jatqan jumystar men jetistikterge oblysymyzdaǵy til janashyrlarynyń da qosar úlesi mol», deı kele, oblys ákiminiń orynbasary Baýyrjan Qońyrbaıuly mereke kúni óńirimizdegi til saıasatyn júzege asyrýda, memlekettik tildiń qoldaný aıasyn keńeıtýge zor úles qosyp, aıryqsha eńbek etip júrgen azamattarǵa alǵys bildirdi.
Oblys ákiminiń orynbasary «Til janashyry» syılyǵynyń eń basty júldesi «Til maıtalmany» atalymynyń laýreatyn marapattady. Bas júlde Qazaq tili oqytýshylarynyń halyqaralyq birlestiginiń múshesi, Qaraǵandy oblystyq tilderdi oqytý ortalyǵynyń dırektory Almagúl Igenovaǵa buıyrdy. Marapat ıesine «Til janashyry» syılyǵynyń arnaıy músinshesi, dıplom jáne 1 mln teńge sertıfıkat tapsyryldy.
«Eńbektiń baǵalanǵany qýanysh, árıne. Bul, eń aldymen, jaýapkershilik. Osy jeńis meniń ǵana emes, áriptesterimniń de jeńisi. О́ıtkeni biz úlken jobalardy áriptesterimizben birge jasaımyz. Osy baıqaýǵa sońǵy úsh jylda jaryq kórgen eńbekterimizdi, jetistikterimizdi usyndyq. Baǵdarlamasy Joǵary sotta maquldanǵan sot salasynyń qyzmetkerlerine arnalǵan 3 deńgeıli oqý-ádistemelik keshen jasadyq, aýdıoquralymen birge. Respýblıka boıynsha barlyq sot júıesinde biz shyǵarǵan oqý quralymen oqytady. Sondaı-aq Qaraǵandy oblysynda ǵana bar ózindik balamasy joq jobalar jasaldy. Saýda, medısına, bank, notarıat salasyna arnalǵan oqý quraldary jaryq kórdi. Til komıtetiniń saraptamasynan ótken biz daıyndaǵan oqý quraldary respýblıka boıynsha myń danamen tegin shyǵaryldy. Oqý quraldarynyń veb nusqasy bar. Qazirdiń ózinde úlken jobalar qolǵa alyndy», deıdi bas syılyqtyń ıegeri.
Sonymen qatar memlekettik til saıasatynyń ózekti máselelerin júıeli ári sapaly jarııalaǵany jáne materıal berý biregeıligi úshin beriletin syılyqtyń «Til jarshysy» atalymymen áleýmettik jelide 54 myń oqyrmany bar bloger, jýrnalıst Aısultan Jaqyp marapattaldy. Til máselesin ótkir kóterip habar daıyndaǵan óńirdiń buqaralyq aqparat quraldary ókilderine beriletin «Úzdik telehabar» atalymy «Saryarqa» telearnasynyń shef-redaktory, jýrnalıst Gúlbaqsha Aqajanovaǵa buıyrdy.
«Memlekettik til – bızneste» atalymy boıynsha BioHumus ǵylymı bilim berý ortalyǵynyń jetekshisi, jaratylystaný ǵylymdarynyń magıstri, PhD Araılym Serikbaı jeńimpaz atandy. Al «Til bilgiri» atalymymen memlekettik tildi erkin meńgergen ózge ult ókili, Q.Sátbaev atyndaǵy mektep-gımnazııa dırektorynyń tárbıe isi jónindegi orynbasary, qazaq tili pániniń muǵalimi Olga Tım marapattaldy. Saran qalasy tilderdi damytý ortalyǵynyń oqytýshysy Dınara Júpenova «Úzdik oqytýshy» atalymynda laýreat atandy. Shet aýdanynyń mádenıet, tilderdi damytý, dene shynyqtyrý jáne sport bóliminiń bas mamany Gúlzada Mahmutova «Memlekettik til – memlekettik qyzmette» atalymy boıynsha jeńimpaz atandy. «Jas polıglot» atalymynda Temirtaý qalasy №9 lıseıiniń shet tili pániniń muǵalimi, I sanatty pedagog Danııar Jańabaev jeńiske jetti.
Jeńimpazdarǵa «Til janashyry» syılyǵynyń músinshesi, arnaıy dıplom jáne 500 myń teńge aqshalaı syılyq berildi.
Qaraǵandy oblysy
