Qazaqstan quramasy bul jarysta tabysty óner kórsetti. Quramynda Bıbisara Asaýbaeva, Ksenııa Balabaeva, Ásel Serikbaı, Merýert Kamalıdenova, Alýa Nurmanova jáne Ámına Qaıyrbekova bar jerlesterimizdiń eń áýeli toptyq týrnırde top jarǵanyn aıta keteıik. Bes kezdesýdiń tórteýinde jeńiske jetken olar tek bir básekeni teń aıaqtady. Shırek fınalda Germanııany súrindirse, jartylaı fınalda Fransııamen biraz tiresti. Qos oıynnyń nátıjesi boıynsha jeńimpaz anyqtalmaı, match taı-breıkke ulasty. Sheshýshi tusta bizdiń qyzdar tamasha oınap, qarsylastarynan basym tústi.
Fınalda jerlesterimiz Grýzııa quramasymen sheberlik baıqasty. Álem chempıony degen ataǵy bar azýly komandaǵa tisimiz batpady. Qos kezdesýdiń qorytyndysy boıynsha 1.5:2,5 jáne 0,5:3,5 esebimen ese jiberdik. Nátıjesinde, grýzınder altynnan alqa taqsa, qazaqtar kúmis aldy. Al qola medal Fransııanyń shahmatshylaryna buıyrdy.
