Bas júlde Qytaıǵa buıyrdy

Erlerdiń jekelegen saıysynda bes dúrkin Olımpıada jáne 13 dúrkin álem men Azııa chempıony Ma Lýngtiń qarqynyna eshkim shydamady. Odan bólek, qytaılyq oıynshy ár jyldary Álem kýboginde segiz jáne Azııa oıyndarynda bes márte bas júldeni oljalady. Fınalda ol óziniń otandasy, komandalyq esepte Olımpııa oıyndarynyń jeńimpazy, dúnıejúzilik dodada segiz ret jeńis tuǵyrynyń eń bıik satysyna kóterilgen Fan Chjendýndy jeńdi. Qola me­daldy taıpeılik Lın Iýn-Djý men Qytaıdyń taǵy bir ókili Lıan Szınkýn enshiledi. Qazaq­stannyń eń úzdik sportshylary Kırıll Gerasımenko men Alan Qurmanǵalıev 1/8 fınalǵa deıin jetti.

Áıelderdiń jarysynda júl­deli oryndardyń barlyǵyn Qytaı sportshylary ol­jalady. Atap aıtsaq, Van Manıý – birinshi, San Insha – ekin­shi jáne Chen Sıntýn men Van Iıdı – úshinshi satylarǵa jaı­ǵasty. Bulardyń barlyǵy da ataǵy alysqa jaıylǵan sportshy­lar. Bizdiń Záýresh Aqasheva men Anas­tasııa Lavrova 32 úzdik ústel ten­nısshileriniń sanatyna qosyldy.

Jerlesterimizdiń arasy­nan eń úzdik kórsetkishke áıel­derdiń juptyq saıysynda qol jet­kizdik. Záýresh Aqasheva/Anas­tasııa Lavrova jáne Sarvınoz Mir­qadyrova/Angelına Roma­novskaıa juby 1/8 fınalda óner kórsetti. Erlerden ondaı qarqyn baıqalmady. Olar qalyń toptyń arasynda qalyp qoıdy. Al mıkste Kırıll Gerasımenko/Anastasııa Lavrova jáne Aıdos Kenjeǵulov/Záýresh Aqasheva juby 1/16 fınalda súrindi.

Komandalyq básekede Qa­zaqstannyń erler jáne áıelder quramasy shırek fınalǵa deıin jetip, qorytyndy esepte segizinshi oryndy qanaǵat tutty. Osy mejege jetken komandalardyń bar­lyǵy da 2024 jyly jalaýy jelbireıtin álem chempıonatyna joldama aldy. Bir qýanysh­tysy, so­lardyń qatarynda otan­dasta­rymyz da bar. Erler saıy­synda Qytaı qarsylas shaq keltirmese, Taıpeı men Ońtústik Koreıa kúmis pen qola medaldy ıelendi. Áıelder arasynda da qytaılyqtardyń qarqynyna eshkim shydamady. Fınalda olar koreılerdi utty. Al Japonııanyń órenderi úshinshi orynǵa taban tiredi.