Foto: gov.kz
Naqty atap aıtqanda, Shardara sportshylary qol kúresten jetkinshekter arasynda 3 altyn, jasóspirimder arasynda 9 altyn, jastar arasynda 3 altyn, múmkindigi shekteýli jandar arasynda 1 altyn, eresekter arasynda 5 altyn jáne 4 kúmis júldeni jeńip alǵan.
Oblys ákimi Darhan Satybaldy álem chempıondaryn qabyldap, qurmet kórsetti.
«Osy sport túrin Shardarada, elimizde damyta bilgen dańqty bapker Arman Qarsybaevtyń eńbegin atap ótýimiz kerek. Mundaı jetistikke jumysyn sheksiz jaqsy kóretin bapker ǵana jete alady. Sizderdiń jeńisterińizge únemi maqtanyp júremiz. Elimizdiń birde-bir óńirinde mundaı kórsetkish joq. Júzden asa álem chempıonyn shyǵarý - tamasha jetistik. Jigittermen birge qyzdarymyz da álem chempıony atandy. Erekshe qajettiligi bar sportshylarymyz da senimdi aqtady. Jeńisterińiz elimizdiń sport tarıhyna altyn árippen jazylady», degen Darhan Satybaldy atalǵan sport túrin ózge aýdandar men qalalarda damytýdy qolǵa alý kerektigin, sport damysa, jastar zııandy ádetterden aýlaq bolatynyn, óńirde sport nysandary salynyp jatqanyn, sport salasyna árdaıym qoldaý kórsetiletinin jetkizdi.
Oblys ákimi apparatynyń basshysy Erkeǵalı Álimqulov sportshylardyń jetistikterine toqtaldy. Sondaı-aq qol kúresten álemniń birneshe dúrkin chempıony ári jattyqtyrýshy Qydyrǵalı Ońǵarbaev óńir basshysyna alǵys aıta kele, Túrkistan oblysynyń qurylǵanyna 5 jyl tolýyna arnap jeńimpaz kýbogyn tabystady. Sportshylar oblys ákiminiń Alǵys hatymen marapattaldy.
Memleket basshysy buqaralyq sportty damytý máselesine erekshe nazar aýdaryp otyrǵany málim. Osy oraıda, oblys ákiminiń baspasóz qyzmeti oblysta 45 sport nysany boı kótergenin habarlady. Onyń ishinde kópfýnksıonaldy «Olympic Center» sport kesheni ashylyp, «Túrkistan-Arena» stadıony, «Tennıs ortalyǵy» paıdalanýǵa berilgen. Konstıtýsııa kúni qarsańynda «Muz saraıy» ashyldy. Qazirgi tańda oblysta Bekzat Sattarhanov atyndaǵy sport kesheni men eskek esý kanalynyń qurylys jumystary júrgizilip jatyr.
Aıta ketsek, Shardara sportshylary osy kúnderi álem chempıonattary men kýboktarynda 149 altyn, 84 kúmis, 19 qola, al Azııa chempıonattary men kýboktarynda 328 altyn, 146 kúmis jáne 98 qola medalǵa qol jetkizip otyr. Onyń ishinde 107 álem chempıony daıarlanǵan.
