FOTO: aldaspaninfo.kz
Olar qazir Esil aýdandyq aýrýhanasynyń juqpaly aýrýlar bólimshesinde em qabyldap jatyr. Dárigerlerdiń aıtýyna qaraǵanda, bireýiniń jaǵdaıy óte aýyr. Topalań paıda bolǵan Úshqarasý aýylynda «Respýblıkalyq epızootııaǵa qarsy otrıad» memlekettik mekemesi qora-qopsyny, jaıylymdardy zalalsyzdandyryp, tórt túlikke túgel kúıdirgige qarsy ekpe egýde. «Shyǵasyǵa ıesi basshy» degendeı, seriktestik jumysshysy jalaqysynyń esebinen berilgen etti otbasyna berip jibergen. Álgi etten as qamdanǵan áıeli qazirgi kúni sibir jarasyn juqtyrǵan degen kúdikpen aýrýhanada jatyr. Naýqastardyń aıaq-qoldary qabara qaraıyp, dombyǵyp, kúp bolyp isip ketken.
– Aýrýhanaǵa túsken naýqastar em qabyldap jatyr. Aýyr haldegi naýqasqa meropenem preparaty egilýde, 52 jastaǵy naýqastyń jaǵdaıy qıyn bolyp tur, – deıdi Atbasar aýdandyq aýrýhanasy bas dárigeriniń orynbasary Muhtar Tomtaev.
Aýrýhanaǵa negizinen seriktestik jumysshylary túsken. Kópshiligi baqtashylar jáne olarmen qarym-qatynasta bolǵandar. Qazirgi kúni 300-ge jýyq turǵyny bar Qarasý aýyly karantınge jabylǵan. Talap boıynsha eldi mekenge jaqyndaý múmkin emes, arnaıy beket qoıylǵan. Aýyl mańaıyn polısııa qyzmetkerleri men dezınfeksııalyq jasaq kúzetýde. Áıtse de, dárigerler men mal dárigerleri qajettilikke oraı óte alady. Onda da epızootııaǵa qarsy jasaq dezınfeksııa jasap, zalalsyzdandyrǵan soń ǵana syrtqa shyǵarady. Jaǵdaıdy birshama jete biletin mal dárigerleriniń aıtýyna qaraǵanda, osy aýyldaǵy seriktestikte ólgen maldyń bireýinen sibir jarasy tabylǵan.
– Pyshaqqa ilikkeni 30 bas, deıdi Aqmola oblystyq veterınarııa basqarmasynyń basshysy Talǵat Júnisov. – Tórt bas maldyń eti qoǵamdyq tamaqtandyrý ornyna ótip ketken. Onyń 536 kılosyn keri qaıtaryp aldyq. Sol ettiń ishinde topalańǵa shaldyqqan maldyń da eti ótip ketýi múmkin. Anyǵyn saraptamadan keıin ǵana aıta alamyz. Bir belgilisi, jergilikti mal dárigerleri tabyndaǵy túliktiń bárin ekken bolatyn.
Topalańnyń soraby ázirge beımálim. Áıteýir, etek alyp ketpese bolǵany. Buryn-sońdy bul ólkede kóz kórip, qulaq estimegen derttiń daqpyrty dúıim eldi seskendirip otyr.
Aqmola oblysy,
Jarqaıyń aýdany
