Sýretterdi túsirgen – Jangeldi ÁBDIǴALYM
«Qazaqstan halqyna» qory, Bilim berý salasyn turaqty damytý qory jáne Nazarbaev zııatkerlik mektepteriniń birlesken jobasy aýyl mektepterine jańa tynys syılap keledi. Osymen oblystaǵy ekinshi mektep zamanaýı kabınettermen jasaqtalyp, jańa oqý jylynda balalardy aıryqsha qýantty.
Mekteptiń irgetasy 1932 jyly qalanǵan. 2015 jyly úsh qabatty jańa ǵımaratqa kóshken. Jalpy syıymdylyǵy 600 balaǵa arnalǵan mektepte qazir 769 oqýshy bilim alyp, 86 muǵalim sabaq beredi.
Joba aıasynda mektepke jańa jıhazdar men tehnıkalar alyndy. Atap aıtqanda, robottehnıka, psıholog, defektolog, mektepke deıingi daıyndyq, shahmat kabınetteri, tigin jáne tamaqtaný mádenıeti sheberhanasy, telestýdııa, STEM zerthanasy, ART-stýdııasy, FabLab, kitaphana, sport jabdyqtarymen birge barlyǵy 36 bólme jańartyldy. «Qazaqstan halqyna» qory mektepti jabdyqtaýǵa 250 mln teńge qarajat bóldi.
– Aýyldaǵy bilim berýdi qoldaý týraly aıtylǵanda eń aldymen, tirek mektepterdi kóterýdi oılaýy kerek. Byltyr Bilim berý salasyn turaqty damytý qorymen birlesip, 17 óńirde 17 aýyldyq tirek mektep qurdyq. Nazarbaev zııatkerlik mektebiniń standarty boıynsha materıaldyq-tehnıkalyq bazany tolyǵymen jańarttyq. Sondaı-aq mektepke taldaý júrgizip, muǵalimder men oqý orny ákimshiliginiń biliktiligin arttyrdyq. Seriktesterimiz úsh jyl boıy ádistemelik qoldaý kórsetedi. Osylaısha, oqý úderisine degen kózqarasty ózgertip, jańa bilim berý tehnologııalaryn engizdik. Qazir 17 oblysta taǵy 63 tirek mektepti jańartý jumystaryn jalǵastyrýdamyz, – dedi «Qazaqstan halqyna» qorynyń tóraǵasy Bolat Jámishev.
Munymen qosa Nazarbaev zııatkerlik mektepteri arnaıy oqytý baǵdarlamalaryn tegin júrgizbek. Bilim berý salasyn turaqty damytý qorynyń barlyq shyǵynyn AITAS holdıngi óteıdi.
Nazarbaev zııatkerlik mektepteri bazasynda pedagogıkalyq ujym men mektep basshylyǵynyń biliktiligin arttyrý baǵdarlamasy da iske qosyldy. Muǵalimder 5-6 aı boıy oqytýdyń zamanaýı ádisteri boıynsha arnaıy kýrstardan ótedi.
Is-shara kezinde oblys ákimi Ermaǵanbet Bólekpaev ult kósemi Álıhan Bókeıhanov esimin alǵan mekteptiń úzdikterdiń qatarynda bolatynyna senim bildirdi. «Búgin bul mekteptiń de, jalpy aýdannyń da jańa taraýy bastaldy. Bilim – tabysty bolashaq kepili. Sondyqtan da bizdiń tirek mektebimiz búkil óńirge sapaly bilim berýdiń úlgisi bolady dep senemiz. Bul – oblysymyzdaǵy joba aıasynda jańǵyrtylǵan ekinshi mektep. Bıyl taǵy alty mektep jańǵyrtylmaq», dedi oblys ákimi.
Jańǵyrtylǵan mekteptiń ashylý saltanatyna arnaıy kelgen Aitas Foundation dırektory Ksenııa Verba «Aýyldyq aımaqtardaǵy tirek mektepterdiń áleýetin damytý» jobasynyń mańyzyna toqtalyp ótti.
– Joba bilim sapasyn arttyrýǵa, ozyq pedagogıkalyq tájirıbeler men ádistemelerdi engizýge jáne tirek mektepterdi qajetti materıaldyq-tehnıkalyq bazamen qamtamasyz etýge baǵyttalǵan. O basta «Powered by NIS» jobasy Shyǵys Qazaqstan men Aqmola oblysyndaǵy birneshe tirek mektepti damytýdan bastalyp edi. Al búginde, ıaǵnı eki jylda el boıynsha 80 aýyl mektebi qosyldy. Endi myńdaǵan oqýshy men muǵalimder jańa mektep jabdyqtarymen, ortaq ádistememen qamtylady. Aýyl nemese qala turǵyny bolsyn, árbir bala tulǵalyq jáne kásibı damý jolynda sapaly bilim alýǵa laıyq. Osylaısha, ol bolashaqta elimizdiń damýyna óz úlesin qosady, – dedi Ksenııa Verba.
«Aýyldyq jerlerde tirek mektepterdiń áleýetin damytý» jobasy aıasynda ótken jyly Aqtoǵaı aýdanynda Kúlásh Baıseıitova atyndaǵy mektep jańǵyrtyldy. Bıyl Shet aýdany Aqsý-Aıýly aýylyndaǵy Jambyl Aqylbaev atyndaǵy mektep-gımnazııa, Abaı aýdanyndaǵy Shoqan Ýálıhanov atyndaǵy mektep-lıseı, Shahtınsk qalasyndaǵy Sáken Seıfýllın atyndaǵy mektep-gımnazııa, Temirtaýdaǵy Álıhan Bókeıhanov atyndaǵy mektep-gımnazııa, Balqashtaǵy Álıhan Bókeıhanov atyndaǵy №15 mektep-lıseı jáne Saran qalasyndaǵy Abaı atyndaǵy orta mektep jańartylady.
Qaraǵandy oblysy,
Osakarov aýdany
