Bıyldan bastap áskerı boryshyn ótegen otandastarymyzǵa birshama jeńildik qarastyrylǵan. Bul týraly óńirlik kommýnıkasııalar qyzmeti alańynda Abaı oblystyq Qorǵanys isteri jónindegi departament bastyǵynyń orynbasary Qanat Sháriphanov BAQ ókilderimen kezdesýinde málimdedi.
– Bıyldan bastap áskerı qyzmet ótkerý kezeńinde tártibi jaqsy, jaýyngerlik daıyndyqta joǵary nátıjelerge qol jetkizgen úzdik áskerı qyzmetshilerge JOO granty esebinen tegin joǵary bilim alýǵa múmkindik beriledi. Qazirgi tańda Qorǵanys mınıstrligi 70-ten astam joǵary jáne joǵary oqý ornynan keıingi bilim berý mekemesimen kelisimshart jasap otyr. Sondaı-aq áskerı qyzmetke barǵan jastardyń nesıe tóleý merzimi shegerilip, 13 aı boıy kredıttik demalys múmkindigin alady, – deıdi Qanat Sháriphanov.
Qorǵanys isteri departamentiniń naqty deregimen aıtar bolsaq, Abaı oblysy boıynsha áskerge jaramdy azamat sany 21 myńnan asady. Al osy kúzgi naýqanda 700 azamat áskerı qyzmetke jaramdylar qatarynda. Onyń ishinde Qarýly kúshter qataryna – 290, Ulttyq ulanǵa – 240, UQK Shekara qyzmetine – 120, Memlekettik kúzet qyzmetine – 10 jáne Tótenshe jaǵdaılar mınıstrligine 40 bozbala shaqyrylady.
Shekara qyzmeti departamentiniń tárbıe, ıdeologııalyq jáne kadrlyq jumystar bóliminiń basshysy Aıdyn Shurymbaev sarbazdar úshin taǵy bir ońtaıly jaıdan habardar etti. Ásker qataryna alynǵan azamattar el aldyndaǵy boryshyn endi óz óńirinde óteýine de múmkindik qarastyrylǵan. Bul qadam vedomstvolyq tártiptiń, moraldyq-psıhologııalyq ahýaldyń jaqsarýyna, sonymen qatar áskerı qyzmetshiniń óz óńirinde kelisimshart boıynsha qyzmetke shaqyrylýyna da múmkindik beredi.
