Foto: J.Jumabekov. Májilistiń baspasóz qyzmeti.
Májilis Spıkeri Koreıa Respýblıkasy Qazaqstannyń Azııadaǵy negizgi saıası jáne ekonomıkalyq seriktesi ekenin atap ótti.
Dıplomatııalyq qarym-qatynas ornaǵanyna byltyr 30 jyl tolǵan Qazaqstan men Koreıa kóp baǵytty áriptestikti nyǵaıtýda joǵary tabystarǵa qol jetkizdi. Prezıdent Qasym-Jomart Toqaevtyń 2021 jylǵy Koreıaǵa memlekettik sapary nátıjesinde eki el Keńeıtilgen strategııalyq seriktestikke qol jetkizgen edi.
«Osy aptanyń aıaǵynda Ulttyq Assambleıanyń Tóraǵasy, áriptesim Kım Djın Pıo myrzanyń shaqyrýymen Koreıa Respýblıkasyna resmı saparmen baramyn. Bul sapardyń basty maqsaty - eki el basshylary ýaǵdalastyqtaryn Parlament deńgeıinde jalǵastyrý. Sonymen qatar Koreıanyń bastamasymen uıymdastyrylǵan «Ortalyq Azııa – Koreıa Respýblıkasy» Parlamentteri spıkerleriniń alǵashqy konferensııasyna da qatysamyn», dedi Erlan Qoshanov.
Koreıanyń Qazaqstandaǵy Tótenshe jáne О́kiletti Elshisi Chjo Te-Ik Palata Tóraǵasynyń Koreıaǵa saparyna sáttilik tilep, dostas elder arasyndaǵy parlamentaralyq baılanystyń damýyna óz úlesin qosatynyna senim bildirdi.
«О́zderińiz bilesizder, bizdiń elimiz 1950 jyldary óte kedeı memleket bolyp, ónerkásip pen saýdanyń arqasynda aıaqqa turdy. Búginde damýshy jáne damyǵan elder arasyndaǵy kópir sekildi ról atqaryp keledi. Koreıaǵa saparyńyz ýaqytyly bolyp jatyr dep oılaımyn. Sapar barysynda Koreıa Premer-mınıstrimen, Parlament spıkerlerimen kezdesýler josparlanyp otyr», dedi Chjo Te-Ik.
Sonymen qatar spıker keleshekte dostyq toptar men beıindi komıtetter deńgeıindegi baılanysty odan ári nyǵaıtýǵa shaqyrdy.
