– Bıyl mekememizdiń 35 jyldyǵyna oraı «Murajaılar qonaqqa keledi» jobasy uıymdastyryldy. Bizge osyǵan deıin Pavlodardan kórme keldi. Bul kórme – beıneleý óneri tarıhymen baılanystyń bir túri. Munda elimizdiń belgili sýretshilerdiń jumystary usynylǵan. Biz osy týyndylarda beınelengen ótken dáýirmen baılanysta ómir súrip jatqanymyzdy sezinemiz, – deıdi mýzeı basshysy Bıbigúl Qudabaeva.
Kórermenderdiń nazaryna Shaımardan Sarıev, Janataı Shardenov, Sahı Romanov, Muhıt Qalımov, Jolaman Aralbaev, Manarbek Dáýletııarov, Qambarbek Amanov, Sadyr Káribaı, Rafael Slekenov taǵy da basqa qylqalam sheberleriniń týyndylary usynyldy.
– Jyl saıyn bizdiń murajaı kóshpeli kórme uıymdastyrady. Biz qaraǵandylyq kórermenge «Uly dala boıaýlary» atty ekspozısııany usynamyz. Munda qorymyzdan 70 kartına ákeldik. Týyndylardy tańdaýda urpaqtar sabaqtastyǵyn buzbaýǵa tyrysamyz. Kórmege aǵa, orta býyn jáne jas sýretshilerdiń kartınalary kirdi. Mýzeıler tájirıbe almasyp, tyǵyz jumys isteýi kerek. Sol úshin de osyndamyz. Bizdiń murajaıda 2 205 keskindeme, grafıka bar, – deıdi Shaımardan Sarıev atyndaǵy Atyraý oblystyq kórkem jáne sándik-qoldanbaly óner mýzeıiniń dırektory Tólegen Orynbasaruly.
Kórmeniń ashylýynda eki mýzeı basshysy yntymaqtastyqty nyǵaıtý týraly memorandýmǵa qol qoıdy.
Qaraǵandy oblysy
