Álemniń ondaǵan eliniń júzdegen kásibı kıno óndirýshisiniń múddesin bir maqsatqa toǵystyratyn mańyzdy jármeńke bul. Forýmnyń fokýsy Orta Azııa elderiniń kınoındýstrııasyna baǵyttalǵandyqtan, otandyq kıno salasynyń bas qarjy operatory Ulttyq kınony qoldaý memlekettik ortalyǵy kınonaryq qatysýshylaryna óz jobalaryn birinshi bolyp usyndy.
Alǵashqy sóz tizginin alǵan UKQMO basqarmasynyń jańa tóraǵasy Qurmanbek Jumaǵalı Kınoortalyq 2019 jyly qurylǵan sátten bastap, jalpy somasy 17 mlrd teńgege 100-den asa kınojobaǵa memleket tarapynan qoldaý kórsetilgenin atap ótti. Kınoortalyq jyl saıyn ashyq baıqaý ótkizip keledi, baıqaýǵa tórt jyldyń ishinde 600-ge jýyq joba qatysqan. Onyń ishinde 47 tolyqmetrajdy fılm, 25 derekti fılm, 24 qysqametrajdy fılm jáne 8 anımasııalyq fılm bar.
«Biz bul jumysty jalǵastyra otyryp, otandyq kınonaryqty qoldaýdyń jańa tetigin engizýdi josparlap otyrmyz. Aldymyzda júzege asyrylýǵa tıis qysqa jáne uzaqmerzimdi mindetter bar. Ol ózgerister, eń aldymen, qoldanystaǵy «Kınematografııa týraly» zańdy, erejeler men eksperttik komıssııanyń jumysyn jetildirýge qatysty qabyldanbaq. Sondaı-aq konkýrsqa qujattardy tapsyrý rásimin de sıfrlandyrý josparlanyp otyr», dedi Qurmanbek Jumaǵalı.
Budan soń jınalǵan qaýymǵa UKQMO basqarma tóraǵasynyń orynbasary Baýyrjan Shókenov Kınoortalyqtyń prokatqa shyǵýǵa daıyn turǵan kınokartınalaryn usyndy. Tereń mazmunymen kórermennen qoldaý taýyp, prokattyń «hıtine» aınalǵan «Aqyn», «Shema», «Baýyrlar», «Paraolımpıadashy» fılmderiniń halyqaralyq iri festıvalderde top jarǵany búgingi qazaq kınosynyń jańa belesin aıqyndaıdy. B.Shókenov atalǵan fılmderdiń ishinde Amerıka men Koreıa kıno báıgelerine shaqyrtý alyp otyrǵan Temirbek Amanjolovtyń «Eva – batyr qyz», qazan aıynda Ispanııadaǵy bedeldi kınofestıvalde kórsetiletin Ashat Kýchınchırekovtiń «Baýyryna salý», Sanjar Mádı, Dáýren Serǵazın, Asylhan Tólepov, Gúlnaz Jolanova syndy tamasha akterlik qurammen erekshelenetin Danııar Ibragımovtiń «Búrkit» ekshn-fılmi bar.
Sondaı-aq áıgili Ádilhan Erjanovtyń «Múıiztumsyq» atty jańa jumysy men Farhat Sháripovtiń «A-Stýdıo» ánderine negizdelgen aýqymdy «Mahabbat sarbazy» mıýzıkli tanystyryldy. Bul jobaǵa Baıǵalı Serkebaev prodıýser-keńesshi retinde tartylǵan. Sonymen birge Maksım Akbarov prodıýserlik etetin «Jaza» atty sybaılas jemqorlyq taqyrybyn qaýzaǵan ekshn-dramasy jáne qazaq repiniń paıda bolýy týraly Aıtore Joldasqalıdyń debıýttik «Shýlama» jumysy kórermenderdiń erekshe qyzyǵýshylyǵyn týdyrdy.
Sonymen qatar Kınoortalyq jeke blokta 2022-2023 jyly memleket qoldaýymen túsirilgen fılmderdiń treılerin tanystyrdy.
Sondaı-aq Eurasian Film Market aıasynda «Frasýz premeralary» atty fransýz kınosynyń festıvali de ótti. Fransııanyń Qazaqstandaǵy bas konsýly Fabrıs Neve eki el arasyndaǵy ekonomıkalyq jáne mádenı baılanystardyń damýynan bólek, Eýropada qazaqstandyq kınoǵa qyzyǵýshylyqtyń artyp kele jatqan úrdisin baıqaıtynyn jetkizdi. Fransýz kınosynyń festıvali uly sýretshilerdiń biri Per Bonnardyń býyrqanysqa toly jeke ómiri týraly baıandaǵan Marten Provonyń «Jalańash mýza» kartınasynyń premerasymen bastaldy. Almatylyq kórermen aldaǵy kúnderi Kann kınofestıvaliniń jeńimpazy atanǵan «Qulaý anatomııasy», «Tek sen jáne men», «Meniń qylmysym» atty fransýz rejısserleriniń týyndylarymen tanysady.
ALMATY
