Foto: Aqorda
«Qordyń uıymdyq qurylymy men sharttyq-quqyqtyq bazasyn jetildirý prosesin tezirek aıaqtaý mańyzdy másele bolyp qala beredi. Qordyń basqarmasy men Atqarýshy komıtetiniń ókilettiligin jáne jaýapkershiligin keńeıtken jón. Memleketaralyq sý sharýashylyǵyn úılestirý komıssııasyn Memleketaralyq sý-energetıkalyq komıssııa retinde qaıta qurýdy usynamyz. Bul sharalar Qordyń tıimdiligin arttyrar edi», dedi Qasym-Jomart Toqaev.
Sondaı-aq ol aımaqtaǵy barlyq eldiń ırrıgasııa, gıdroenergetıka jáne ekologııa salalaryndaǵy múddelerin eskere otyryp, Ortalyq Azııanyń sý-energetıka resýrstaryn tıimdi paıdalaný úshin uzaq merzimdi ári ornyqty aımaqtyq yntymaqtastyq mehanızmin qurýdy usyndy.
«Bizdiń oıymyzsha, Halyqaralyq sý-energetıka konsorsıýmy osyndaı mehanızmniń rólin atqara alar edi. Aral teńizi basseınindegi sý resýrstaryn esepke alatyn, monıtorıng jasaıtyn, basqaratyn jáne bóletin biryńǵaı avtomattandyrylǵan júıe engizý boıynsha jumys josparyn ázirleý. Bul bastamanyń júzege asyrylýy aımaqtaǵy sýdy paıdalanýdyń ashyqtyǵyn qamtamasyz etip, Ortalyq Azııa elderimen aradaǵy dıalogty jáne dostyqty nyǵaıtýǵa yqpal etedi», dedi Prezıdent.
Budan soń, ol Ortalyq Azııa elderiniń klımat máseleleri jónindegi jobalyq keńsesin qurý týraly aıtty. Bul qadam klımattyń ózgerýine beıimdelý jáne onyń saldaryn azaıtý úshin pármendi sharalar ázirleýge múmkindik beredi.
«Biz Bishkektiń Qordy jetildirý jónindegi Jumys tobynyń qyzmetine atsalysýyn oń baǵalaımyz. Qyrǵyz Respýblıkasy qaıtadan Halyqaralyq Araldy qutqarý qorynyń tolyqqandy múshesi bolady dep úmittenemiz. Keleshekte biz baýyrlas Qyrǵyzstannyń Qorǵa tóraǵalyq etýin qýana quptaımyz», dedi Q.Toqaev.
